場景也是電影的角色之一，《廚師發辦》的選景和拍攝過程也有故事，有遺憾，也有驚喜。早前問了兩位導演黃浩然（Amos）和鍾宏杰（Frankie），以下是他們的分享。
廣東道玉器街某舖位
Omakase主景
Amos：主景其實冇變過，我哋拍完戲之後就租咗俾而家嘅租客，業主係我中學嘅師弟。
Frankie：我一入到去呢個主境就即刻有一種80年代香港好優皮嘅感覺，再加上你見到戲中陳樂添著住西裝恤衫，更加令我recall到80年代香港電影嗰種都市形象，啲角色係唔係都著住西裝恤衫咁樣，即係UFO公司電影嗰種香港特有嘅優皮都市感，有趣嘅係唔只我有呢種感覺，記得有一啲演員或者觀眾都向我提過，我好開心。其實講緊嗰種80年代嘅優皮，我當年好細個冇真正經歷過，嗰種印象完完全全係嚟自嗰個時代嘅香港電影。因為場景俾到我呢種感覺，recall到我呢個情懷，所以令我對呢間餐廳主景再多咗一份溫暖同感情，所以拍到餐廳關門大家要離開嘅時候，個情感會重少少。
豐力樓
林克（小野）車中泊的地方，和的士司機（柯星沛）閒聊的位置
Amos：其實我唔係想拍而家呢個位，我係想拍下邊嘅位置，我其實想拍咗十幾年，但係呢十幾年嗰個位越搞越多嘢，本來原本個位好正，以前更睇到啟德機場條跑道嘅直線，而家搞吓搞吓冇曬以前嘅嘢（起咗個公廁，觀景位置被大樹遮蓋），結果我哋就喺上邊拍。
昂船洲大橋觀景點
林克（小野）車中泊的地方
Amos：其實我唔特別大興趣去橋底拍，但我哋又搵唔到另一個代替嘅景，而攝影指導梁銘佳好鍾意呢度。我哋曾經諗過一個地方（在荔枝角），睇地圖好正，喺嗰度拍車中泊好型，但係平面拍過去拍唔到想要嘅感覺。另外，林克朝早起身嗰幕其實我哋做錯咗一樣嘢，如果大家熟悉呢度，片中太陽嘅位置其實唔係朝早，係大約下晝三點，咁之後我哋都討論過林克可唔可以瞓到三點呢？其實又可以喎，只要佢當日冇booking，其實佢係可以瞓到三點。
愛民邨
林克（小野）與單親媽媽（張紋嘉）的段落
Frankie：另一個景俾到我Bonus嘅想像就係張紋嘉單親媽媽嘅屋企，我哋喺愛民邨拍。其實好重要嘅係我哋拍嗰個廚房嘅窗口係望到林克同單親媽媽兩個人相約嘅地方，嗰度其實有一場半暗場戲，講張紋嘉約咗林克喺樓下等，佢就喺屋企廚房嘅窗口望落去，慢慢觀察清楚林克呢個人，我哋當時都有討論，呢個媽咪嚟㗎喎，帶一個男人上屋企，未見過嘅，第一次就帶上嚟，屋企仲有兩個女，其實係好危險同魯莽。但係劇情需要，所以我哋都千方百計去處理，於是前面就加場戲講佢點樣偷偷地搵個位觀察，心裏面又喺度struggle係咪真係去迎接呢個男人。本身諗住喺屋邨內某一個暗角埋伏咁睇嗰種，但係我哋一睇到個景，發現廚房隻窗口望落去嗰個angle好正，其實我哋都有拍到個angle，但因為個廚房真係窄得滯，所以我唔能夠反拍得到，帶到多啲窗口嘅關係同埋張紋嘉望落去嘅特寫，所以令到佢喺窗口盤算要唔要接林克上嚟嗰樣嘢喺鏡頭傳達上面未夠準確同強烈，呢個係有少少失望。但係我都好開心能夠將一場我覺得普通嘅場面調度設計變成更運用到公屋同埋屋邨嘅空間。
澄碧邨
未竟之志
Frankie：有咩係想拍但拍唔到呢？一個永恆嘅大佬，就係澄碧邨。其實本身Renci戴舒利嘅老家係唯一我哋想聯繫返《緣路山旮旯》嘅一樣嘢。澄碧邨個景我哋都睇咗兩次，好可惜因為製作條件所限，遠赴澄碧邨拍攝其實唔係技術上做唔到，而係要投資嘅時間實在太大，所以只能忍痛放棄。其實我寫咗成個段落，係講林克第二次見戴舒利，先喺長洲嘅碼頭等，然後兩個一齊坐船，坐完第一程船，大家之間嘅距離同感覺已經有啲唔同咗，跟住要再喺長洲轉一隻艇仔去澄碧邨嘅時候，兩個人嘅關係又再近啲再親密多少少，其實係先用一個旅程去煲起林克同Renci，再去到嗰晚煮完飯再入房咁樣。你問我作為編劇寫個古仔，梗係想啲嘢再細膩啲啦，同埋亦都活用到呢一段遠赴澄碧邨嘅旅程，咁就一下子破咗第一次煮意大利餐嘅失敗。但係我哋條件所限要忍痛放棄，相當遺憾，所以澄碧邨一路都繼續係我哋嘅未竟之志。
最喜歡哪一段／場景空間？
Amos：食物嘅場口我最鍾意壽宴，幫Quincy（王利民）賀壽那場啲食物係最好。至於拍得最好嘅戲我個人覺得係野炊嗰晚，同埋臺南林克與台妹嗰場都唔錯。另外我自己好鍾意嘅係小林克（黃梓賢），我覺得佢做得非常之好。【P.S.：黃梓賢是《年少日記》黃梓樂的親哥哥】
Frankie：講到最鍾意，偏心都一定係張紋嘉公屋單親媽媽嗰場，因為廚房嘅逼逼狹狹，我哋冇去做分鏡，用一個long take長鏡頭去拍佢哋。用呢個long take，一個mid closeup去將佢哋框住喺狹窄嘅廚房，嗰種親密感我覺得係成套戲最親密嘅時刻。尤其係佢哋個background，萬家燈火嘅公屋，好庶民好草根好街坊嘅東西，但越係喺呢種好庶民好草根好街坊嘅東西裏面去搵到呢種親密感，我覺得反而突顯咗成套戲最浪漫嘅時刻。兩位演員其實亦都好有感覺，爭啲kiss嗰下真係好sexy，所以我特別鍾意呢一幕。
劇照提供：高先電影
