去年入圍金馬獎最佳動畫片的兩部電影皆來自香港創作人的作品，《世外》與《小虫蟲大冒險》，兩部動畫可以瑜亮作比喻，各有千秋。要在香港的創意土地灌溉動畫創作絕對需要堅剛之毅才能完成，《世外》如是，《小虫蟲大冒險》亦然，而兩部皆需要外援作盾，前者有中東等地的資金，後者也有來自台灣、馬來西亞等地的資源才得以成就作品。《世外》去年已公映，來到暑假尾聲，《小虫蟲大冒險》也終於在香港正式公映。早前特別邀請電影導演袁建滔（後稱滔）接受訪問，詳談這部電影在他創作路上的角色。

每個階段都是修煉

滔90年代初畢業於香港浸會學院傳理系，主修電影。在學時和畢業後在文化和影視界做過不同工作，出過書、做過雜誌主編、漫畫編劇、電視綜藝組編劇、做過動畫、拍過真人電影…… 這些工作是否是他曾幾何時所追求的？是否小時候所謂的志願？

「其實又唔算真係志願，反而喺初中年代真係好想做漫畫家，但畫嚟畫去都畫得唔好，睇返轉頭係有少少端倪，其實我好鍾意畫分鏡，但畫完分鏡之後就冇心機一筆一筆畫到尾，咁做動畫啱晒啦，畫完storyboard就俾人做。」

滔表示每一個人生階段都是修煉的過程，來到今次的《小虫蟲大冒險》就是集大成過往的經驗和知識。「我成世人學嘅嘢一次過喺呢部戲曬冷，又實拍又動畫，跟住又編又寫，跟住去到宣傳，我全部識嘅都用盡晒。」

陰差陽錯地開始 一關來一關過

《小虫蟲大冒險》始於2007年，滔說過程有點陰差陽錯。當時他純粹諗一個低成本的項目，盡量用最平的方法實行，所以才會用昆蟲、用真實的背景合成、沒有對白……但他現在回看，原來並非想像中便宜。「因為我哋唔會有好靚嘅架生，好多都係handheld，事後其實花好多時間去stabilize。特別係牽涉微距攝影嘅時候，或者入面有啲鏡頭需要變焦嘅時候，好多嘢out曬fo。」

滔指拍攝時只有一位攝影助手，轉Fo時有出錯，加上難以單靠現場的monitor作判斷，他往往事後看footage才發現問題。「明明啲戲應該喺呢個位做，但個fo唔知飛咗去邊，我哋當然唔會有錢補拍，咁咪即場再諗囉，係咪唔要呢個鏡頭？定係將啲戲搬去後邊做？好多千奇百怪嘅方法，一關過一關咁樣去處理。」

滔表示拍《小虫蟲大冒險》讓他罕有地經歷不斷的變動，這是以往未曾試過的。「以往做動畫係你可以慢慢做，剪到你啱心水先至落手畫，畫完有乜嘢唔啱就改，跟住去到composite嗰度也可以返轉頭再改，好多嘢你可以control，但去到《小虫蟲大冒險》就冇㗎啦，你只可以變通，總之就係不擇手段去做你想做嘅嘢，我覺得其實都好玩嘅。」

滔表示拍攝時全部會先拍兩次，先用3D print出來，通常是整場戲或某個鏡頭演一次，給相關劇組知道發生什麼事，然後攝影師會去想，與大家討論鏡頭、燈光等事宜。第二次則拍空鏡，攝影師要盡量還原剛做的所有動作。拍攝時經常會出現變化，他特別提到「雀仔街」一場，原本想向Rob Reiner作品《伴我同行》（Stand By Me）當中經典的火車橋一段致敬。

「我好鍾意Stand by me，少年們喺火車橋路軌上行嗰場戲，佢哋以為好安全，點知後面有輛火車向他們駛來，在焦急下逃跑……原本喺雀仔街嗰段諗咗一場將鳥籠排一條好似火車橋嘅路，草蜢同蜘蛛以為好安全，結果啲雀喺後面啄佢哋，跟住就一路逃亡。於是我哋就實拍，揾啲嘢引啲雀，但係啲雀完全唔睬我哋，冇反應。」其後劇組想過用CG做，但一來貴，二來做出來唔靚，已疊埋心水放棄，但在這刻他想起睇景時遇過一位雀店老闆，那時他正在餵飼雛鳥，可能太餓的關係，雛鳥的食相如狼似虎，那刻令他留下深刻的印象。「我膽粗粗問佢可唔可以借俾我哋拍，佢又肯喎，但最衰係啲雀已經喂咗一次，所以唔夠hungry，因為我第一次睇嗰陣真係好正，雛鳥好似暴龍速龍咁追住嚟咬，而家你哋睇個版本已經係最好嗰個，但其實佢哋已經餵飽咗唔願郁。」

滔也提到另一場戲關於公寓內的金魚，在綵排時發現餵飼金魚時牠有趣的視線方向，於是劇組在拍攝時就懂得如何引導金魚的視線，在做animation的時候再將蜘蛛的活動配合。「呢段係拍咗個footage返嚟再諗，呢個又係計劃以外。」

好聽啲就係傲氣  唔好聽就係唔識死

滔提到他由細玩到大的好友喬靖夫，二人同樣喜歡做一些不一樣的事。「好聽啲就有傲氣，唔好聽就係唔識死。」

「其實我哋好似，都好想做一啲大家未睇過嘅嘢。譬如佢第一本書《幻國之刃》，間諜加武術加唔知咩嚟；第二本《吸血鬼獵人日誌》，吸血鬼加打鬥又少少神秘學；第三本《殺禪》，黑幫武術再加政治，其實大家都唔知咩嚟。我哋成世人就喺度challenge一樣嘢，點解我要再做返一樣咁嘅嘢呢？好啦，碰夠壁，咁佢就寫武俠小説，咪一嘢就搞掂囉，其實佢嘅能力不嬲都喺度。」

滔覺得自己仍在行這條不斷有挑戰的路，特別是製作《小虫蟲大冒險》的時候。「麥兜都係半接job，即係佢已經有既定嘅IP，我盡量用我能力去serve大家做好佢。去到自己嘅嘢，你係要做一啲大家難以理解嘅類型，咁你受盡折磨都係自己攞嚟，但我都改變唔到，天性嚟。」

早年的《汪汪夢裡人》（Robot Dreams）和《貓貓的奇幻漂流》（Flow）的成功彷彿為《小虫蟲大冒險》打了底，但滔表示起初以為可以行得輕鬆一點，但其實都是差不多，關鍵在市場，但香港不像中國、美國和日本可以自給自足。「我哋啲Indie animation其實大部分都要攞政府funding，所謂跨國合作其實都係被逼嘅，因為你根本冇錢，亦都好難揾到私人投資。就算跑創投，其實我從來未見過碰面嘅人會攞住幾千萬出嚟話我投你，𢯎撈就大把。另一方面就係劇組相關人員申請當地嘅補助，譬如我哋嘅producer係臺灣人，所以我哋攞咗臺灣嘅投資同補助，但我會講得好清楚，一個仙我都唔會攞佢嘅，佢攞嘅錢全部都洗喺臺灣人度，我覺得咁樣會fair。」

滔表示，在製作上縱使有時與團隊有不同意見，他認為這些不同意見其實也代表其他觀眾的想法。「我成日搞一啲挑戰大家嘅項目，聽晒我講係有啲危險，所以我會退返步諗，可能普羅觀眾係expect一啲咁樣嘅嘢，我都會跟佢哋嗰一套，盡量打散佢，唔好聽晒我講。」

釘落棺材後翻生的作品

《小虫蟲大冒險》從2007年開始，到14年第二次重啟，之後再經歷各樣問題，滔形容當時的項目像釘咗落棺材一樣，並打定輸數。及後是19年的金馬創投，到22年正式開工，釘落棺材的項目翻生，但期間仍波折重重，幾經辛苦拆掂一個局又到另一個，到正式開工後也反覆地遇到困難，他不諱言這些經歷令自己大開眼界。旁人會對他的堅持佩服，但他強調不要將堅持浪漫化，他純粹努力將件事做好。「當項目開始咗，有人揼咗舊錢落嚟，例如馬來西亞嗰邊嘅funding，佢哋都壓上公司信譽，當中有好多責任喺度，唔到你去逃避。」

但他沒有想到這電影可讓他發揮多年來累積的經驗，使盡渾身解數盡用他所認識的知識和技能。「當然我唔係話佢做得好Perfect，但起碼喺我自己嘅層面嚟講，一步一步行到嚟呢度，發覺原來以前學嘅嘢就係咁樣用，有少少感概。」

電影完成了，並不代表導演的任務完成，宣發等工作接踵而來，這也是滔不擅長的工作。「原來經營一部電影或任何作品，唔只係做好咁簡單，你要諗埋點樣sell，今時今日仲要sell埋你個人。我唔鍾意出鏡，但係你要將自己KOL化，你嘅作品先至賣得出。以前倪匡古龍匿埋寫書就搞掂，依家唔得。我好佩服Nolan，佢其實係一個producer，連拍乜都已經係一個新聞，由開鏡第1日一直講到上畫，佢真係奇才。」

文字創作

除了動畫，滔的文字也很好看，他昔日常在博客分享創作和生活，近期更不時重新分享當年的文字。「我慶幸有寫呢啲，特別係同細路嘅相處，我而家好鼓勵人寫，因為我發現拍片其實都唔夠，嗰種感覺，你寫低就係一世，你唔寫就會冇㗎喇。」

還有一部已寫了40萬字的小說，小說本來是多年前創作的劇，但劇開不成，但他覺得故事ok，故此在疫情的百無聊賴時在家寫起來。「我都諗緊小說究竟係咩類別，可以係校園嘅科幻，可以係驚慄，其實我都唔知係咩嚟，好難一口氣解釋俾人聽，只覺得喺度寫緊一啲好好睇嘅嘢，係我哋未睇過又好得意嘅嘢。」

滔貫徹以往喜歡挑戰約定俗成，他形容這小說難以被世俗的分類法歸類。「市場需要分類，分唔到類係會製造麻煩，譬如書局，你會製造麻煩俾佢哋。」所以這次他想從Penana連載，因為小說的根本就是劇，很適合以連載的方式閱讀。「我本來都有啲猶豫，直至睇到《繁花》嘅作者講佢開頭都係嘗試喺網上連載，發現原來同讀者嘅互動又會產生另一樣意想不到嘅嘢出嚟，我覺得其實都可以試吓。」

後記

「講到遺憾呢樣嘢，我覺得自己做嘅嘢唔差，但係就欠了曝光，譬如寫書，你係連賣書嘅地方都冇。」訪問期間特別感受到滔作為創作人的無力，碰壁、被拒絕和妥協，《小虫蟲大冒險》行到現在殊不容易，但就如豐富的人生要有經歷，拍電影亦然。上天有時也很公平，難關往往能引導您看見更好的風景。

《小虫蟲大冒險》優在簡單直接平易近人，帶出重要的人生課題而絕非陳腔濫調，小朋友或許會得到某些啟蒙，成年人或許會有一份來自時間沉澱的感受。

攝影：Gary Wong @電影朝聖
劇照：英皇電影