《一個部門的誕生》以一件荒謬的真人真事為靈感，為了cut台可以去到幾盡，在荒謬背後是披着亮麗友善的虛偽皮囊，骨子裡是去人性化的本質，大家習慣了妥協退讓，貪婪的人唔會講多謝，只會得寸進尺。世界縱使荒謬，但電影沒對人性放棄，在混濁中仍可呼吸到清新的空氣，提醒如何做返一個人而唔係一粒掣。看畢電影，心裡有3個冷門一點但卻重要的問題，早前特別問了麥天樞導演。

第一問：關於致敬黑澤明經典作《流芳頌》與《天國與地獄》

電影朝聖：
《一個部門的誕生》中有一段關於cut台的montage是導演特別向黑澤明作品《流芳頌》（又名《生之欲》）致敬，黑澤明在該幕講述政府部門如何將市民的投訴一層一層的推卸下去，最後投訴諷刺地返回最初的部門。導演特別向黑澤明作品致敬，分享一下這位電影天皇對他的影響？

麥天樞：
黑澤明嘅導演功力真係好勁，尤其我第一次做導演就更加發覺，《流芳頌》嗰段講所謂官僚制度，一個推一個，講法好有趣同埋簡潔，佢直頭係每個官一個shot，跟住就slide走，我其實已經複雜咗，我一場戲都有分鏡，所以都冇得照抄，原本真係有諗過slide走學埋個剪接，不過好難完全直接跟，因為已經唔同咗。
其實套戲參考得最多應該係《天國與地獄》，因為同一個場景嘅調度，《天國與地獄》係好極致，60分鐘都喺富翁屋企個廳，嗰個調度實在太驚人。我同攝影師司徒一雷一齊翻圇嗰個調度最少都四五次，嗰個Timing好正，佢條神仙軌又勁，嗰條軌來來去去嘅調度都可以玩到咁多變化，絕對有想抄佢嘅方法，但結果去到現場係一樣都execute唔到，因為自己處理演員嘅調度技巧太生疏，淨係諗走位都搞唔掂。演員喺現場都會有input，譬如排戲嘅時候，Yukki（戴玉麒 飾脅持人質的德仔）覺得自己一個人好不安，所以會搵方法困住其他人質，去到現場rehearsal嘅時候，佢提議不如拉張梳化嚟頂住其他人質，呢個input又好啱喎，但係條神仙軌就肯定唔可以存在，所有分鏡都要重新嚟過，即時就已經冇可能抄到黑澤明。大師級就係你即使100%唔諗照抄都係抄唔到，黑澤明嘅導演功力真係好強大，而我本身唔係佢嗰種mind set，要直接模仿係有難度。
電影基本上個大結構甚至人物架構都係仿照《Dog Day Afternoon》（黃金萬兩），譬如第一稿劫匪德仔嘅character係比較虛啲嘅，其實我利用呢種虛架空咗劫匪嘅身份，從而帶出人質嘅互動點睇呢件事，第一稿人質係重啲嘅，但後來發覺射歪咗，避重就輕逃避咗一啲問題，於是就參考返《Dog Day Afternoon》阿爾帕仙奴塑造呢個人物嘅方法，篇幅如何分配。新導演嘅經驗一定喺經典身上學習返嚟，我覺得《Dog Day Afternoon》好睇，咁就試吓用佢好睇嘅模式攞落嚟用。

第二問：關於華富邨

電影朝聖：
電影除了「客服部」的主景外，也選擇在華富邨取景，那裡成了主角德仔（戴玉麒 飾）的老家，是否想透過電影記錄快將重建的華富邨？

麥天樞：
其實係緣分多於情意結，其實我只需要一個公共屋邨，因為德仔係一個來自基層嘅人。我冇前設話一定要華富邨，其實我喺荃灣區長大，我一諗其實係福來邨。
華富邨有唔少港產片拍過，又就快拆啦，所以會有多啲空間可以拍。加上製片團隊以往都試過喺華富借單位拍攝，所以connection已經存在。睇景時覺得華富邨係好嘅地方嚟，又有海，可能性好多，除咗普通公共屋邨應有嘅景，例如巴士總站、斑馬線、舊建築群等各方面，佢呢個年齡嘅公共屋邨一定有佢嘅味道。

第三問：關於銀河映像

電影朝聖：
《一個部門的誕生》讓我想起了銀河映像的創業作《一個字頭的誕生》，適值Milkyway步入30周年的時刻，是否有意紀念？

麥天樞：
我聽聞30周年係下年，杜生認證話係九七年。
《一個部門的誕生》嘅Timing，我覺得一命二運三風水冇得計算，24年開機都係天時地利加加埋埋。如果有密切留意韋生（韋家輝）嘅動態，其實24年佢曾經想開機，冇記錯嘅話應該係《神探大戰2》，佢直頭埋咗班搵景，因為我本身係幫緊韋生寫劇本嘅，佢埋位我一定義無反顧幫咗佢先，我印象中佢係五六月份左右埋位，我就疊埋心水嚟緊三四個月一定好忙，所以我嘅項目就擺埋咗一邊。但係埋咗位3日，仲搵咗一兩日景就嗌停，冇透露俾我聽具體原因，總之知道今年唔會開，咁我就同韋生講，其實我有一個咁樣嘅計劃，你唔開不如俾我開先啦，所以24年拍都係一個天時地利各方面加加埋埋出現嘅事，所以你話要計算到銀河映像30年可以上畫呢件事係冇可能發生嘅。
銀河映像對我嘅影響一定好大，我08年入行，雖然唔係day one喺銀河映像開始，但係由合作嘅第一天到今日都14年，作品唔算多，因為我認識杜生韋生或者乃海嘅時候，銀河映像嘅產量已經唔算多，但喺我電影生涯裡面，學到最多嘢一定喺佢哋身上，有機會向佢哋致敬總係想嘅。
最開初嘅時候，劇本同《一個部門的誕生》呢個戲名係好match嘅，因為第一稿嘅ending係開宗明義話有一個服務部誕生，大家可以開開心心去cut台，跟住嗌cut就有戲中戲，第一稿係類似一個咁嘅ending，所以片名係好符合嘅，因為戲名已講到重點，當時都幾興奮可以用到呢個名。但去到最後階段要扑搥時卻有好大掙扎，因為故事已經射歪咗，有冇一個部門誕生已經唔係套戲嘅重點，咁仲應唔應該起一個唔係好有關係但純致敬嘅片名呢？當中係有好大掙扎，因為我嘅working title係叫《跳掣》，呢個情緒係我最想講嘅重點，兩個名我都好鍾意，但係好明顯見到《一個部門的誕生》始終有佢嘅玩味，雖然唔係食得最應，但食到少少又有玩味又致敬到，《跳掣》就可以話擲地有聲指向咗一個情緒，兩個都有佢嘅優點缺點。」

攝影：Gary Wong @電影朝聖
劇照：寰宇娛樂