智慧讓人類成為萬物之靈，但也為人類帶上執念的枷鎖，人間循環不息的痛苦與災禍也因此而起。在奇幻的《世外》空間，小鬼與小妹之間最純淨的承諾感染着戲院內的觀眾，為執念的記憶鬆綁，回到最初被忘記的善良。製作歷時七年的《世外》無疑是今年最受關注的港產片之一，電影入選具影響力的安錫國際動畫影展「午夜特別場」單元，並入圍第62屆金馬獎最佳動畫片的候選電影，是港產動畫電影的一個里程碑。早前訪問了《世外》的編劇兼監製楊寶文（Polly），談談這部重要作品的前世今生。

除了《千年鬼》，還有兩本書

《世外》改篇自日本作家西條奈加的小說《千年鬼》，但在《千年鬼》之前，有兩本書影響Polly甚深，第一本是精神科醫生Brian L. Weiss的作品《前世今生》（Many Lives, Many Masters），內容來自他其中一位女病人，在催眠治療的過程中發現她的前世。

「醫生幫佢催眠嘅時候，佢冇去到兒時嘅記憶，而係去咗前世，仲要係好多好多段前世。佢見到每一世嘅自己係點，身邊嘅人係點，有時去到遠古巴比倫時期，有時係羅馬時期，有時甚至係近代，佢通常會見到自己臨死前嘅狀態，跟住靈魂會飄上半空接受和暖嘅陽光，然後master就會出嚟，佢未必係一個人形，可能係一把聲，會話俾佢聽今世已學識咗呢樣嘢，咁你可以去下一世，又或者你今世仲未學識呢樣嘢，你下一世仲要繼續學落去。呢本書對我嚟講係好震撼嘅一件事，原來我哋每一世嘅扣連唔係想象中死咗就再重生咁簡單，我覺得好有意思，而呢樣嘢對我講一啲好難解決嘅古仔，例如憤恨和怨恨，我覺得會幫到我。」

第二本是蔣勳老師的《吳哥之美》，內容來自蔣老師過往十多次遊歷吳哥窟的感受，他覺得吳哥城像一部佛經，經文都在日出、日落、月圓、月缺、花開、花謝，生死起滅間誦讀傳唱，等待個人領悟【註一】。《吳哥之美》並非一部純粹的旅遊書，而是從微細的觀察看見文化和生命的本質。

「其中有一段我有好深感受，裡面寫佢睇咗兩大印度史詩式故事，其實來來去去都係講緊無常，跟著佢話無常交織出不可思不可議嘅事情，或許只係人類咁自大為生命做判斷，呢個觀點好震撼我。我成日都唔明點解人嘅判斷可以咁快狠準，覺得一定係咁，嗰句令我知道人好自大，對生命唔應該咁樣作判斷，而呢個生命喺我心目中可能唔係一世嘅生命，而係要好多世嘅生命先可以睇到個結果，所以如果睇闊啲，相信佢總會有時，時間總會嚟，會唔會舒服啲？會唔會容易啲放下執著呢？」

講返《千年鬼》，Polly表示這本小說教曉她很多智慧，特別是關於「惡人」這概念，惡人不是天生的，當中一定有原因，這個因可能來自今世，也可能是前世積下的。她強調看待一個人可以多一份懷疑感，不要立馬判斷人的好壞，也要多一份同理心，想一想為何他／她會這樣。

「《千年鬼》觸動到我嘅係講人性，人性係殘酷，但我見到裡面嘅善良。最厲害嘅部分係鬼之芽呢個concept，鬼之芽喺我哋心裡面，佢被憤怒同仇恨滋養慢慢生長，生長嘅速度你係控制唔到，你唔會知佢喺度，幾時知呢？係你已經唔係人嘅時候，係連人樣都冇埋嘅時候。我覺得好真實，喺而家嘅世界睇到好多人鬼，人唔似人鬼唔似鬼，其實咪係由呢樣嘢開始。作為編劇，小說嘅visualization對我嚟講好有效果，呢樣好重要，因為我唔係寫小說，我係寫一個劇本，需要拍得出嚟。」

作為編劇

Polly第一個寫的劇本是張之亮導演的《肩上蝶》，她表示電影起初是朝動畫劇本的方向去寫，後來才變成最後的真人加動畫，在導演的主導下作調整。「對我嚟講，之後無論係自己編劇或者監製，我都會involve喺劇本裡邊。真人和動畫電影嘅最大分別係裡面嘅character，我哋睇一位演員演戲，你可以長時間望住佢講對白，但係動畫嘅character就唔可以，佢哋嘅面冇皺紋冇微表情，點畫都唔會畫到好細緻，但係人可以，你望住劉青雲，佢講好耐嘢你都依然會津津有味，因為佢裡面有好多微細嘅嘢你可以欣賞，所以寫動畫片嘅劇本時，如果有好多對白，我需要諗方法用其他鏡頭去幫佢過渡。」

《世外》改篇自日本小說《千年鬼》，Polly編寫劇本時需要為電影重新詮釋故事，第一部分是建構世外。「世外係我哋嘅片名，其實小說裡面係冇世外嘅，佢係人死後和準備投胎前要去嘅地方。世外對我哋嘅古仔最重要，我成日諗，自己死後會想去一個願意逗留嘅地方，將今世嘅嘢好好放低，我想呢個地方同大自然有關係，因為我哋同大自然冇咗連結好耐，我好相信大自然本身同我哋係有溝通，但我哋唔記得咗。所以世外呢個地方，裡面細到一嚿雲都有佢嘅生命，任何一樣嘢都有佢嘅awareness，呢個係小說最大嘅改動，亦都係我最想呈現嘅元素。」

第二部分是關於心結，這是電影的重要靈魂。「我創作嘅過程中，好想有一個visual同觀眾一齊感受心結解開嘅狀態，所以創造咗有結嘅紅繩，我覺得呢樣嘢幾有效果。我相信電影好似你腦裡面嘅一粒種子，你未必會知道佢對你有咩影響，但呢粒種子可能喺你生命某一瞬間突然發芽，不過就唔係鬼之芽，佢可能會幫到你。」

空間也是編劇要考量的地方，《世外》在空間的構想也花了不少心思。片中講到小妹投胎前要經過一個讓她忘記或放下今世記憶的地方，那幕充滿想像力的天馬行空為觀眾帶來感動的想像空間。「首先我好唔鍾意飲孟婆湯呢條橋，好老土呀（大笑）。其實《世外》短片嘅忘記過程都好優美同傷感，角色圍住棵樹倒後行7個圈，每一個圈你會忘記一方面嘅自己，譬如第一個圈可能忘記你嘅國家，第二個圈會忘記你嘅家鄉，第三個圈會忘記你嘅屋企人，去到最後係忘記你自己，然後你會一身輕，可以穿過瀑布去投胎。」

來到長片，Polly不想重複短片的點子，於是她想到用冰湖來呈現小妹放下一段。「我好鍾意冰島嘅冰湖，一嚿一嚿，嗰種藍色和白色嘅通透乾淨，其實我好早寫嘅時候已經諗到冰湖，但我未諗到點放下。通常我嘅靈感嚟自瞓醒覺嗰一瞬間，而我真係有一日喺瞓醒覺嗰一瞬間諗到，我即刻起身記下。我最開心係睇到小妹放下之後嗰種輕鬆和無憂無慮，我諗嗰個應該係我哋嘅本我，如果detach呢啲記憶，每個人都可以輕鬆啲。我好鍾意呢一場戲，呢個設定其實都放埋我鍾意嘅景落去，或者呢個世界仲可以impress我嘅嘢就係大自然，所以你睇到世外係冇建築物和人類嘅痕跡，因為我覺得最純粹嘅大自然係最靚。」

作為監製

《世外》製作歷時七年，Polly作為監製，這條路可謂荊棘滿途。「尤其係Covid，Covid後嘅小陽春去到小陽春嘅幻想爆破，好多投資者都唔夠膽投資，有退出有猶豫，我覺得好正常。我哋嘅投資者唔只係香港，係來自全世界，所以需要考慮嘅嘢較多。」Polly強調她純粹想完成這個項目，在自己能力範圍內做到最好。「我唔係一個咁複雜嘅人，如果我複雜可能就做唔到《世外》。」

但這份不確定，反而冥冥中有意想不到的發現和緣份，特別是找到來自中東的投資者。「對我嚟講係妙想天開，我冇諗過一個關於輪迴嘅古仔，仲要係動畫，會有中東嘅投資方有興趣。再者，其實我冇乜信心，但對方俾咗好多信心我，佢哋話一定得，嗰下我覺得好好笑，通常係我要去説服投資者，但今次反而係個投資者話project一定得。」

《世外》面世以外得到海外不少影展的青徠，也相繼賣出不同國家的發行權，當中包括日本和美國市場，更有機會在意想不到的地區上映，例如中東。Polly不諱言電影給她機會看看世界，擴闊了眼界和視野。「我哋本身話要做到國際性，但都冇諗過咁國際，喺中東上畫呢件事我真係冇諗過，但原來真係可以，原來唔係一件冇可能嘅事。」

電影在香港公映前走過海外不同的影展，對Polly來說也有一番感受，特別是海外觀眾的接受程度，比她想像中大。「相對一般電影，海外觀眾接受到動畫有好多可能性。平時我哋會將一般電影分為genre，譬如驚悚片，動作片等，但動畫可能會少咗呢一層，因為佢可以包含好多嘢喺裡面。另外，通常外國人問我嘅第一句係『乜香港有動畫咩？』我會答佢哋有好多，我哋其實都好叻㗎。」

最讓Polly驚喜的是他們對「輪迴」這概念沒有認知障礙，這有助於她與投資者和發行商溝通。「輪迴嘅概念係最重要，如果連呢樣嘢都搞唔清楚就好大問題。我好surprise佢哋冇barrier，當然前人亦做咗好多宣揚輪迴嘅工作。再者，導演嘅visual真係好靚，我哋每次去一個唔同嘅地方都會嘗試設計一張新海報，舊陣時賣電影一定係sell演員，但唔係每位演員都行到全世界，但動畫就唔使驚，你只要個visual good enough和unique就可以，例如《世外》嘅小鬼真係好特別，冇人見過一個咁嘅character，既可愛又有少少驚嚇，呢個mixture令到海外嘅觀眾有興趣和期待。」

世外：一個想像以外的地方

《世外》面世後得到廣泛的關注和正面迴響，但電影能行到這個階段殊不容易，特別是在香港這片動畫工業不成熟的土壤。在訪問Polly的過程中，深深感受到她對《世外》的愛，這部電影相信在她的創作生涯中佔了很重要的位置。

「我有好大感觸，覺得原來自己相信嘅嘢係會發生。劇本改咗咁多次，我每一次睇住自己寫嘅劇本都喊得好犀利，到而家都係。我成日同自己講，既然我自己都被感動，應該都會感動到觀眾。《世外》嘅最大意義係，當我播呢套戲嘅時候真係有觀眾被感動，我唔係一個只活喺自己世界裏面嘅人，原來嗰個共震係會發生。開始嗰陣，對於要完成呢個project信心唔大，因為完全唔知點做。7年前整咗個短片之後，諗下試下咁樣做，但宇宙係奇妙嘅，當你覺得值得做，個宇宙係會幫你嘅。」

《世外》，不只是戲內，戲外也是一個想像以外的地方，只要相信和堅持。

註一：蔣勳著：《吳哥之美》（台北：遠流，2013年）

攝影：Gary Wong @電影朝聖
劇照來源：安樂影片