第二十四屆香港亞洲電影投資會（HAF）將於三月十七至十九日舉辦，與香港國際影視展 （FILMART）同期舉行。HAF 是電影業辦公室項目市場旗下的重要項目之一，為亞洲電影創作提供投資配對及合製機會。當中的製作中項目（WIP）單元旨在協助即將完成拍攝的電影計劃尋求後期製作資金、發行商及電影節等合作機會。今屆共有12 項WIP獲選，當中包括由張婉婷監製，黃綺琳與黃鐦合導的《我阿爹想旅行》，早前與兩位導演了解這項目的來龍去脈。

薪火相傳計劃

《我阿爹想旅行》這項目來自政府推動的「薪火相傳計劃」，以師徒傳承理念，邀請具資歷的導演作為監製，伙拍新進導演開拍本地電影。張婉婷、黃綺琳（Norris）與黃鐦以《我阿爹想旅行》成了計劃的師徒組合。現實中，張婉婷是黃綺琳在浸會大學讀電影時的老師，大約2020年，張婉婷與羅啟銳告知Norris這項計劃，問她有沒有想拍的故事。「一開始個故仔係關於父女元素，係一對姊妹去幫爸爸籌備喪禮嘅古仔，之後發展落去其實經歷咗好多嘢，譬如Covid，之後經歷咗《填詞L》由籌備到上映嘅過程，最重要係其中一次開會前兩日，突然收到Alex（羅啟銳）突然過身嘅消息，所以監製就由兩位變做一位，呢件事對我哋好大打擊，尤其係對Mabel（張婉婷），開始想將題目focus講生死，點樣去面對突然離世呢樣嘢，跟住就開始慢慢發掘呢個故仔。」

Norris表示Mabel經常鼓勵她，對這個項目給了很大的支持。「我記得以前佢成日教我，有錢就拍喪禮，冇錢就拍墳頭，我於是攞住呢個宗旨去拍《填詞L》，所以好習慣如何妥協。但今次唔同，佢話唔好成日妥協，唔好成日cheapy cheapy，如果想做就要堅持，要信自己。」阿鐦表示未遇到像Mabel這樣的監製，以往的監製通常會叫他慳住洗，會問有沒有地方可以妥協？「但Mabel係完全相反，佢話你哋咁樣寫出嚟就唔好退，我未試過有咁supportive嘅監製。」

合作無間

Norris與阿鐦是合作多年的伙伴，從拍攝影視作品甚至到攪影展，二人一直都合作無間，《我阿爹想旅行》是二人首次在長片作品合導，他們皆表示與以往的合作模式其實沒有什麼分別。

阿鐦：「其實我自己覺得冇乜大分別，就算我哋唔同崗位，喺創作同現場拍攝嗰陣其實都一樣。喺劇本階段我哋會一齊度橋，之後Norris落筆寫，拍攝嗰陣可能我負責多啲同crew和演員溝通，做多啲現場嘅設計，咁Norris會focus 戲多啲，例如講嘅對白啱唔啱之類。」

Norris：「我哋從來都冇好清楚去傾分工，但同我哋夾開嘅導演組都大概知道遇到問題要問邊位，呢個模式都行之有效。」

與之前二人的作品不同，這次有不少新合作的班底，阿鐦感謝Mabel的號召，得到不少有江湖地位的電影人參與。「例如美術有Man San（文念中），我哋之前未合作過，攝影師搵咗余靜萍，都係我哋一直都好佩服嘅攝影師，之前合作過《愛情城事》嘅短篇，但未合作過長片。另外，今次我嘅剪接都唔係以前合作開嘅班底。」

阿鐦表示，這個班底其實正好符合這項計劃傳承的精神，從中學到很多東西，「我哋之前做嘢都比較土法煉鋼，但今次發覺比我哋有經驗嘅電影人，原來佢哋做嘢嘅流程同考慮係咁樣嘅，令我哋大開眼界。」

張家輝 鍾雪瑩

《我阿爹想旅行》是Norris和阿鐦二人未拍過的類型，阿鐦定義是一部有少少喜劇元素的公路電影，他覺得電影既然來自傳承計劃，就要去嘗試一些未試過又好玩的東西。「我哋成日諗呢個傳承計劃嘅意義，就係從legendary嘅導演去學到一啲嘢，然後就利用呢個資源喺我哋套戲度試一啲從來都冇拍過嘅genre。」電影首先看見最新鮮的一定是主演組合，張家輝搭鍾雪瑩。

阿鐦這次反問我覺得這對組合如何，我覺得鍾雪瑩是意料之內，反而張家輝是一個大驚喜，很難想像他與這類小品電影連結。但電影就是創造，不斷地問why not？

Norris表示最初brainstorm時真的有想過張家輝，阿鐦認為適合這個年齡層之餘又啱vibe的演員其實不多，張家輝是其中一個目標，但開始時不覺得可以成事，誰知原來什麼事都有可能，而緣份來自前年的烏甸尼遠東電影節。

「前年烏甸尼影展，我同鍾雪因為《填詞L》過去參與，張家輝因為《贖夢》而一齊過去，最後其他香港電影都走晒，淨返我哋兩套戲，於是就約埋食飯，原來家輝都有睇《填詞L》，佢當時客氣地表示如果大家合作都係幾得意嘅事，我返到去就真係諗，覺得手上呢個project真係啱，再check家輝同鍾雪嘅年紀又真係可以做到父女，咁我就開始具體地諗，喺劇本上有咩可以調整。」

Norris覺得將兩位在概念上來自不同系統的演員放在一起很有意思。她表示張家輝是電視台出身，參與過很多商業製作，是一位很準確的演員之餘也有參與創作。鍾雪瑩較生活感，過往拍很多短片和獨立製作。「兩代咁唔同嘅演員加埋一齊，正好乎合薪火相傳嘅題目，有個傳承喺度。」阿鐦補充：「亦都好似真實嘅父女，上一代同下一代，有一個bonding之餘又互相有矛盾，嗰樣嘢又幾得意。」

與商業類型片演出經驗豐富的張家輝合作，三人都有傾過電影的定位，大家都希望今次能向觀眾多一點，但商業與文青戲也可以同時兼顧。「喺家輝嘅角度睇兩邊都可以揀，無論係戲嘅選擇，或者係成套戲嘅風格，同佢哋兩個嘅演出，其實一路都喺寫實同類型中間拉扯遊走。有一場戲，拍完一個比較寫實感嘅版本之後，家輝再提議試吓speed up成件事，當以前舊喜劇嘅節奏去拍，即係限時一定要講晒全部嘢，睇吓效果如何，就係要去嘗試碰撞一啲唔同嘅玩法。」

場景

電影在香港、澳門與沖繩三地取景，Norris表示選景上有三個考慮點。「一開始係諗邊啲地方啱個故仔，即係呢對父女想完成嗰啲task要去邊度做呢？另一個concern就係個tone，即係嗰啲地方縱使喺文本上行得通，但係出嚟嘅視覺效果嗰個tone係唔係啱呢？第三個concern係製作嘅budget。」阿鐦補充，所選擇的地方都是香港人想去短trip的地方。「我哋要keep住有去旅行嗰個感覺俾觀眾，即係未去過嘅會想去，去過嘅會對於嗰個地方某程度上係熟悉嘅。」

阿鐦表示其實之前也曾考慮過不少地方，有泰國、韓國、東南亞等亞洲景都考慮過，最初更考慮過歐洲，例如比利時，他們更為此搜集不少資料，但當中遇到很多掣肘，發覺都是不可行。最終選擇的沖繩，除符合基本的選景要求外，更為劇組帶來意外的驚喜。「沖繩呢個地方既啱我哋嘅production，亦都好啱個vibe。因為劇本最後一個場景要求特別高，嗰場係電影嘅climax位，我哋喺沖繩揾到一個甚至俾要求更加fit嘅場景，係喜出望外，連演員去到都好有感受。」

Norris表示自己之前去過一次沖繩，寫劇本的時候也未知是什麼樣的地方，像開盲盒似的。

挑戰和期望

相對二人過往的創作，這是一次新的體驗和挑戰。

阿鐦：「對我自己嚟講，呢套戲係我最不確定嘅一套，對我嚟講係比較高難度。這次都係我哋第一次想電影盡量商業，唔知搵唔搵到個平衡，到時可能要靠觀眾俾反應我哋。」

Norris：「我就反而覺得好似我拍《金都》嗰陣嘅感覺，就係好沮喪，其實就好迷茫，因為《填詞L》始終係自己控制晒全部嘢，但今次就比較多不確定性和未知，有某啲嘢好似開盲盒，有時會遇到啲驚喜，但係都好玩嘅地方。」

這其實也乎合這部公路電影的質地，戲裡戲外也在不斷探索。

對於入選今屆HAF的WIP單元，二人期望能從中可找到後期製作的support。也因為現時電影仍在剪接階段，所以也希望在投資會的三天聽到對製作上有用的意見，還有獲得出席其他影展的機會。

攝影：Gary Wong @ 電影朝聖

劇照：HAF

香港亞洲電影投資會（HAF）簡介：

香港亞洲電影投資會（HAF） 是電影業辦公室項目市場旗下的重要項目之一，多年來一直致力為亞洲電影創作提供投資配對及合製機會。透過 HAF，不同發展階段的電影項目能夠在國際市場中被看見，並直接與全球業界建立聯繫。

HAF 旗下設有多個支援單元，覆蓋電影製作的不同階段。發展中電影計劃（IDP） 專注於仍處於開發階段的項目，協助創作者深化故事內容及製作方向；而 製作中電影計劃（WIP） 則聚焦正進行後期製作的作品。入圍 WIP 的導演及監製將參與公開推介會（Open Pitch），向業界展示項目進度及片段，提升作品在投資、發行及影展層面的能見度。

每年於 FILMART 期間，入圍 HAF 的電影計劃均可與國際投資者、製片人及發行商進行一對一會面，深入討論融資、合製及發行可能性，讓項目在創作階段已能對接市場需要。

此外，HAF 設有多個獎項，為入圍項目提供實質資源及支持，協助電影順利開拍及完成製作。過往不少曾參與 HAF 的項目，其後成功走進國際影展體系，並於康城等國際級影展亮相，進一步印證電影業辦公室項目市場作為亞洲電影走向國際的重要產業平台角色。