《像我這樣的愛情》是「小天」導演譚惠貞繼《以青春的名義》後第二部電影作品，兩部都是愛情電影，但同樣是與眾不同的愛情故事。要做到與眾不同殊不簡單，當中可見一份堅持，而堅持的代價往往很大，特別是在香港的電影工業內。很少見像小天這樣的導演，率直有個性，有自信之餘也能直視不足，8年後再訪問她，感受到她的成長和進步，一切皆來自她不因循的創作基因。

非典型愛情

小天兩部作品都是愛情片，是她對這題材情有獨鍾，還是有其他原因？她斬釘截鐵地說因為不擅長拍攝其他種類的電影。「例如我唔了解戰爭所以我唔會拍戰爭題材，再加上預算問題，所以都好難拍警匪動作片，呢個係我哋呢一代導演嘅限制。」

驟眼看故事簡介，很容易墮入一種約定俗成的故事套路，身障者、照顧者……必定是朝社會性方向說故事，必定會帶出某些訊息，但電影卻不行大路而另覓蹊徑，小天亦強調這電影並非一部社會性電影，她表示近年已有相當多關注社會題材的作品，但這並非她那杯茶，而這也是創作的最大難度，要在典型的類型和元素中拍出不平凡，究竟要從何入手？

「其實大家都話家樂子妤嘅角色好難演，其實我都好難寫，因為咁多人拍過呢類題材，點樣去拍到獨一無二又有自己個性呢？呢個世界唔需要多一套《綠洲》，唔需要多一套《缺氧37秒》，世界各地每個地方都有拍過坐輪椅嘅角色，香港都有《無名指》、《淪落人》，咁你點樣拍一套同人哋唔同嘅電影，我覺得呢樣先係最難。」

性義工

愛情片是類型，但真正觸動小天的是故事。她表示拍完電視劇《理想國》之後，其中一位編劇向她介紹一個台灣的性義工組織，但當時她沒有興趣寫相關故事，但緣份再讓她與這題材連上，她強調並不是她選擇了這個題材，而是題材選了她。再加上她覺得上一部電影拍得太保守，她渴望有一個新的挑戰去彌補上一部的缺點。

「係機緣巧合之下認識一位喺台灣做過性義工嘅人，我哋相約見面傾偈，傾到我喊晒，佢同我講咗好多故仔，其中一個係有一對父母知道自己個仔有性需要，見佢好辛苦又冇得解決，所以打電話去約義工上佢屋企幫仔仔解決，嘩，我覺得呢啲爸爸媽媽真係好開明，除咗照顧佢嘅身體日常，仲照顧埋佢嘅心靈需要。但香港呢？香港啲無障礙設施全部做得好好，但從來都冇顧及過佢哋有冇呢樣需要。」

另一個讓小天感動的故事來自一位身障者的經歷，與之前的例子相反，她不能光明正大讓父母知道她找性義工服務。「性對亞洲人嚟講係忌諱，特別喺香港，我覺得連內地人都性開放過香港人，台灣更加係，但偏偏香港係好先進和文明嘅城市嚟，大家都好gentle，但卻對性好抗拒，例如呢個唔可以俾父母知道佢搵性義工嘅身障者，佢咁大個女都未戴過bra，未著過靚嘅裙，未化過妝，但係佢可以喺呢個服務入面化粧著裙戴bra，甚至可以同啲friend自拍，影好多性感嘅相，但佢返屋企之前要掉晒啲衫抹晒啲粧刪晒手機入面啲相，呢啲係佢人生唔可以流傳嘅記憶，但亦係佢人生最美好嘅記憶之一。」

劇本

談到劇本，小天前後花了6年去寫，經歷多次推倒重來，2019年的第一稿只留下阿健這個角色的名字。她承認自己的劇本有時會讓劇組摸不著頭腦，因為沒有具體講任何劇情，最後一稿只簡單寫分鏡。

「劇本翻譯睇完個劇本後即時打俾我，話未睇過啲咁嘅劇本。演員睇完都會𢲷晒頭，因為我唔想寫好具體嘅嘢落去，我要演員自己諗係咩反應。我唔係諗住俾大家欣賞一個文學劇本，而係純粹攞嚟做分鏡，話俾攝影師聽點拍，咁我喺現場會拍快啲。」

但她強調很清楚每場戲究竟發生什麼，也完全了解人物與故事的關係，因為劇本的脈絡已在她的心中，這模式或多或少受到她的老師張叔平影響。

「我過去3年都坐喺張叔平隔籬睇佢剪片，我幾乎已成為佢嘅學生。剪片嘅時候，佢可以好精準同助手講呢度少咗兩格或者五格，我會問佢點解你知道呢度少兩格或五格，但佢唔會答到你，譬如你問我點解可以做到戲中人物互有扣連，我真係唔識答，或者就係時間嘅洗禮，對角色嘅鑽研或者執著，對呢個角色嘅愛同關心，嗰樣嘢就會出到嚟。」

渴望改變的陳家樂

電影發掘了一個未被看見的陳家樂，片中的性義工角色給他很大的發揮空間，也發現他有不同的可能性。對於家樂的角色，小天和家樂二人共同下了不少工夫。

「好多人都覺得廖子妤（Fish）嘅角色好難演，但其實陳家樂嘅角色都好難做，因為佢同呢個角色距離好遠。家樂本身係一個好幸福嘅男仔，佢好早就簽咗電影公司，好早就有戲拍，當然佢浮浮沉沉好耐，但都有人錫住佢。家樂性格好純真，佢唔係一個好似我咁樣好憂鬱和焦慮嘅人，佢同個角色距離好遠，所以佢喺現場真係問好多問題，最大鑊係我哋兩個未connect到，例如我解釋俾佢聽佢唔明，唔係因為佢唔聰明，而係佢真係冇呢啲經歷，所以喺現場導佢要有啲方法，後尾我就用咗一個錯嘅方法去導佢，點知佢又get到。」

從家樂近年的作品和相關訪問中，感覺他渴望在演藝路上作出改變，追求進步和挑戰。小天表示家樂很清楚自己在演藝路上需要做什麼，在電影中需要做到什麼和取得什麼。而她對家樂也特別苛刻，希望能激發他的演出。「家樂會不停問我問題，但我從來都唔俾答案佢，所以令到佢好confuse和焦慮。我係故意嘅，因為如果你話俾佢聽呢個杯係綠色嘅話，佢就認定咗呢個杯係綠色，佢就唔會想象呢個杯可能係黃色、橙色，咁就限制咗佢嘅演技。所以我唔會話俾佢聽健係咪鍾意阿妹，你入咗個角色咪知道囉，最後佢真係演到。」

小天特別感謝家樂的真誠和信任，在現場真的將條命交給她。「佢現場真係咁，叫佢做乜都一定會做。但我就扮睇唔到聽唔到，縱使佢做得好好，我都唔會俾任何肯定佢，我確實喺精神上幾摧殘佢，但我唔摧殘佢又去唔到咁盡喎。」

給演員空間

小天認為導演要有不同的方式指導不同的演員，不能一本通書睇到老。「一嚟導演唔係演戲老師，唔好以為自己可以教演員做戲，你只能夠話俾佢聽角色係點樣；二嚟你一定要睇住佢有無離開個角色，如果你冇呢個sense，做導演就好大鑊，AI都拍到啦，導演就係要做到一啲AI做唔到嘅嘢。」

從言談之間，感到小天並非一位只下達指示要演員跟着走的導演，反而她會留空間給演員發揮，從中給她一些意想不到的啟發或衝擊。「我第一部就係咁，劉嘉玲嘅演出其實同我想做嘅係另一樣嘢嚟，但佢表現出嚟嘅係OK喎，佢嗰種淡，好似冇神咁，但又講得通㗎喎，佢就係一個冇咗靈魂嘅女人，佢咁樣演冇問題，但唔係一般觀眾接受到。」

對於Fish，小天表示必須給她自由去發揮。「你唔可以喺現場教廖子妤做戲，你教佢做戲你死梗。」她從來沒有限制Fish如何演繹這位身障者角色，她認為腦麻並非只有一種反應，就像揸筷子並非只有一種方式，她對Fish說依着自己的身體去演。「例如我寫佢右手做到嘢，但佢話左手做到嘢對演員會好啲，因本身佢係右拗，如果用左手畫畫，佢會覺得演到腦麻嗰種感覺會強啲。」

小天表示，過去已有太多電影拍過這類角色，例如李滄東的《綠洲》，片中的腦麻嚴重到不能說話，還有真的找腦麻演員演出的《缺氧37秒》，所以她要拍一些不一樣的，希望做到一個中間位。「其實中間位係最難嘅，呢點亦都係我搵演員搵咗五六年都揾唔到嘅原因，因為冇人夠膽演，冇人handle到呢個角色。而當我知道廖子妤夠膽死接嘅時候，我就覺得應該要俾信心佢，佢都唔驚死我驚咩呢？反正我都會喺後面睇住佢，如果touch wood練得唔夠咪延後拍囉，我嗰陣已經有晒心理準備，點知佢係一個天才。」

天註定的主角

小天表示她從沒有追過星，縱使是做《掃毒》編劇的時候，面前是古天樂、劉青雲、張家輝等都沒有過電，她認為這是好事，因她不會對某一個演員有特別偏好。所以她對陳家樂和廖子妤也沒有過電，三人能夠合作是冥冥中注定的緣分。

「煞科嗰日，我個腦突然間閃咗出嚟，哦，原來我咁辛苦搵咗五六年嘅女主角，就係為咗等廖子妤個期，呢套戲係註定由佢嚟演。陳家樂亦都係一個緣分，係呢個劇本驅使我去揀陳家樂，呢個劇本一開頭係搵One Cool投資，古生亦都冇拒絕我，後來因為想搵英皇其中一個演員嚟做，佢哋睇咗劇本後叫我過去拍埋，其後陳家樂睇咗個劇本，佢經理人想我見家樂，之後就搵咗佢做男主角。」

她感恩有這緣分，由劇本牽引她找到二人演出，當中的信任給她力量完成這部電影。「而家諗返起真係我嘅幸運，佢哋兩個話好多謝導演乜乜乜，其實係我要多謝佢哋。佢哋對我嘅信任，係佢哋俾咗啲嘢我，唔係我俾佢。」

還有飾演Fish母親的劉雅麗和健胞姊的楊淇同樣出色，小天覺得母親的角色出色在拿捏得準，不可以多也不可以少。至於楊淇，原來起初找她演義工Eva一角，到臨開機前半個月才突然決定她演家姐。「我大約2021／22年見楊淇，嗰時搵佢做Eva呢個角色，所以特登帶佢見手天使義工，搞咗好耐，點知臨開機，我又係突然間叮一聲，我同佢講你唔係做義工，你做家姐，佢都好surprise。」再加上楊淇本人曾患過抑鬱症，所以她演家姐一角是完美的。

特別介紹：配樂袁敏聰

電影配樂是袁敏聰（Kelvin），大學讀土木工程，但自小已接受古典音樂和大提琴訓練。曾在美國紐約大學修讀音樂與作曲碩士，主修電影及影視配樂。Kelvin暫時只為兩部香港電影配樂，除了《像我這樣的愛情》外，另一部是鄒穎執導的《紅豆》。小天與Kelvin結緣自《一念無明》導演黃進的介紹，她在仍未找到投資時已開始為電影物色配樂，但都未能找到合適的，直至認識了Kelvin。「我聽返Kelvin之前作嘅歌，真係有一兩首好有feel，於是我同佢講用呢幾首嘅style作一輯配樂俾我聽，當然我事先俾個劇本佢睇。喺我未搵到投資時，我同佢已傾咗成年，到拍完剪片時，我覺得某段需要音樂就會剪條片俾佢睇。」

小天覺得Kelvin最好的地方是他懂得看劇本，讓電影因為音樂增色。「行內識睇劇本嘅人真係好少，識睇劇本好緊要，特別係攝影和燈光，識睇劇本才可以做到嗰個層次出嚟。今次合作除咗配樂好之外，負責美術同造型嘅張兆康都好（他在片中也客串一角），佢又係一個識睇劇本嘅人，我真係好放心。Kelvin喺LA做電影配樂，好young嘅九十後，開頭都有擔心，但我將呢份信任交俾佢，而佢作出嚟嘅音樂係異常地好。」

小天表示這部電影需要配樂，因為電影很靜，少對白，她抗拒用對白交代劇情，認為無需事事都講出口。她特別提到片中楊淇丈夫離開她的一段。「我搵咗龔兆平（《他年她日》導演）客串飾演楊淇丈夫，佢叫我俾句對白佢，如果唔係佢做唔到。你唔可以話唔得，有啲嘢你係要俾演員做咗先，如果唔係佢入唔到個狀態，所以佢想講就俾佢講，後面係可以剪㗎嘛。」

她提到Fish最後一個鏡頭的配樂，自優先場以來，有部分觀察向她表示配樂有點詭異，這讓她曾徘徊在修改與否的決定之間。「佢哋唔係專業影評人或資深電影人，但佢哋代表咗一部分觀眾。於是我同阿叔（張叔平）和大家商量之後，就叫咗Kelvin再作一首柔和啲嘅配樂，但最後我都決定揀返而家呢一首。阿叔都話係大膽嘅，但佢話我都已經拍到咁咯，點解唔大膽啲呢。正如佢同我講，呢部戲係挑戰觀眾嘅，我認同。拍完《以青春的名義》之後，我思考自己想要成為一個點樣嘅導演，如果我擺返一首平平無奇嘅音樂落去，佢嘅力量又有冇咁大呢？我覺得呢首音樂先至夠力量去支撐嗰場戲。我覺得做創作唔可以顧及所有觀眾，因為你要做一部有你style嘅作品就註定有人同你唔同軌道。」

我從來都冇懷疑過自己

「我唔知人哋點樣睇我，但我從來都冇懷疑過自己，即使我第一套戲拍得唔好，包括呢一套到時可能會好多負評，我都唔會懷疑自己。」

小天緊記張叔平對她說的話，無才華是沒有可能做到導演，這說話給她很大的鼓勵。「有人同我講，新導演頭三部好緊要，第一部輸唔緊要，第二部再輸都唔緊要，但輸第三部就真係玩完。佢用咩衡量去定義輸先，我當你三部都冇票房，冇獎攞，咁係咪證明你冇才華呢？可能你真係要問吓自己，如果真係冇才華嘅話就真係唔好喺呢行繼續做。但係咪三部就可以定義你生死？我覺得唔係，只要你有才華就可以寫第四部。阿叔講得好啱，你冇才華就唔好做導演，你唔好同我講香港電影已死，喺香港做電影好辛苦，千祈唔好講呢啲説話，你覺得辛苦咪唔好做囉，冇人逼你，淨係需要問自己，你有冇才華先，你冇才華咪走囉。」

小天覺得做創作一定要比其他人走得前，否則會被淘汰，作品也不能流傳下去。「我哋要做自己嘅作品，要做一部可以留到俾我個女睇，佢會覺得OK嘅作品，呢個先至最緊要。」

後記：葵涌

訪問地點是小天的工作室，那裡也是她經營的店，位於葵涌工業區，該區也是電影的主要取景地。小天不諱言在葵涌取景也有私人的情感因素。「我鍾意葵涌，我鍾意石蘺，因為我喺葵涌住過兩年，我想喺離開之前做一個記錄。」

攝影：Gary Wong @電影朝聖
場地：《無紙》IG：sanspapergirl
劇照：英皇電影