2014年，非常林奕華以《梁祝》這個民間故事詮釋情感、生命與藝術，在不同的時間與空間探索或孕育新的可能。2024-25年，劇團訂下這段時期為「梁祝的一年」，這是一個經歷十個年頭的中點站（並非終點站），10年間周遭的無常讓環境和生活起了巨大的變化，同時間亦沉澱出新的想法，藉着這部不老不朽的民間傳說呈現新的可能格外有意思。早前在《梁祝聲音節》期間訪問了林奕華（Edward）和張國穎（Margaret），細聽二人分享當中的心路。

Covid催生的意念

「做完《梁祝的繼承者們》9年後，有一天鄭君熾問我，喂，明年10周年有冇諗過開party？係喎，之前我從來冇諗過，尤其係經過covid之後，我又覺得成個角度唔同咗。」

Covid令整個世界停下來，彷彿讓Edward有時間細想，所做的東西價值何在？有哪些會消失？有哪些能夠留下來？有沒有東西可以永續發展？「嗰陣大家都話由covid行出嚟之後唔好再重複以前，大家一定要見多啲朋友，要慢活返啲，但當行出嚟之後，大家又好似冇經歷過一樣，但我認為創作唔可以咁，創作係佢留低咗一粒種喺度，你就要去淋水。所以Jordan（鄭君熾）嘅想法，我係有認真去諗。」

Covid催生了想法，但也令戲劇的經營生態起了變化。Edward表示巡迴是劇團昔日挺重要的資源，但Covid之後已不可能，因為很多地方都不能說通就通，再加上閉關令各地都發展自己的資源出來，重新敲門就變得困難。

「如果我哋再做嘅話，冇可能再用10年前嘅規模，所以要諗點樣去節儉，但與此同時亦唔可以寒酸。所以我諗，可唔可以將佢變成一個發展式嘅系列呢？令佢唔只係一個作品，而係可以喺唔同嘅情況下都可以有一個規模冇咁大嘅作品，令佢繼續生長。最重要唔只係做一個紀念品出嚟，係做一個喺將來嗰個10年都可以延伸第二啲嘢出嚟嘅作品。我哋第一件事就做梁祝10年後，第二件係我哋可唔可以將呢啲演員嘅才華，放喺梁祝嘅屋頂下用第二種方式呈現，睇吓可唔可以研發另外一啲唔同嘅東西出嚟。」

Edward補充，適值今年是藝術發展局30週年，局方希望劇團為此做一個作品，當時劇團想到一個關於《紅樓夢》的項目，加上Edward認識林嘉欣，林與陶瓷的關係可連結《紅樓夢》的女媧，他覺得很有趣，可惜最後不能成事。後來他靈機一觸想起聲音節，那不如就將節目放在藝發局的藝術空間發生，並找來Margaret作節目的策展。

Edward一直希望為Margaret「度身做件衫」，為她做一個Solo演出，但去年的《A.I.時代與梁祝的繼承者們》讓他有另一個想法，在「梁祝的一年」的過程中，在終極的《有一天我和祝英台去美術館》之前，生了「梁祝聲音節」這個項目，讓Margaret運用她的長處策展一系列節目，這也成了原本Solo的變奏。「Margaret對音樂嘅知識係全方位的，有好多人跟佢學唱歌，除了演音樂劇之外又幫好多歌星做和音，見證佢哋點樣處理聲音。」

Edward透露梁祝聲音節原本叫梁祝音樂節，從售票角度當然是音樂節這名稱佔優，聲音節相對較抽象和知性，但他希望觀眾不只去欣賞和拍掌，而是要參與，要發言。「我哋嗰個聲音唔淨係唱歌，譬如講座二講李琳琳，我會覺得佢係另外一個範疇嚟，聲音可以同你嘅性格，從戲劇嘅角度，或者從人生嘅角度去看。譬如講座一講填詞，其實文字點解會發到聲，而你又想要文字發邊一種聲。」

聲音

聲音是最原始的溝通媒介，比文字和語言更早。Margaret說聲音是赤裸的，從一個人的聲音中，可讓人更了解對方，同時可找回最真實的自己。「對於我嚟講，梁祝其實由11年前開排嘅時候一直都係關於inner voice嘅嘢，係戲劇嘅monologue，其實係同自己對話。」

從演員的身份來說，梁祝讓Margaret學到的是自畫像。「歌詞不停repeat嘅一句，『我知道 我都知道 除了我是誰』，我有冇唔同面向嘅自己？」Margaret提到聲音節「自畫像」工作坊中有一個核心問題，究竟有多少人真的喜歡自己的聲音？有沒有一種客觀的方法看自己？但隨着時代推演，音效技術、A.I.魔法等科技愈來愈出神入化的當下，聲音彷彿已不是自己的聲音。「工作坊要大家聆聽彼此，一齊揾同唱返那個聲音，返去最原始和lo fi嘅狀態。」

聲音節當中一個關於形體的工作坊，目的是自我探索，重新連結身體、聲音和環境。「當原始人住喺山窿嘅時候，每一刻都要應對身邊嘅環境，We are our bodies，we are voices and what is the environment？」Margaret強調這份探索對一個演員或一個人來說都是核心的東西，因為Body Language也是一種聲音，是每個人都必須學的東西，特別是在香港這麼擠逼的地方，工作坊是要讓觀眾體驗，如何用身體表達自己。

Margaret覺得現代人慣常與世界隔開，例如很多人搭飛機時會戴上降噪耳機，但她認為劇場和藝術工作者不能與環境隔離，要對身邊的聲音有一種靈敏。聲音節有一個A cappella節目，用人聲再創造一個環境。「你要夠靈敏記得身邊產生過嘅聲音，例如我記得愛丁堡海鷗飛過嘅聲音，好似人聲，係大笑嘅人，朝早6點會以為係啲醉酒朋友返嚟嘅聲音，呢啲就變成我記得嘅聲音。」

經過歲月加持的聲音最有力量，Margaret是性情中人，在策展期間也免不了被封存的聲音感動。特別是籌劃聲音節最後一晚大合唱和切蛋糕的節目時，百般感受衝擊她的淚腺。「明明我要好冷靜去做策展人，但我望見個video就想喊，因為我唔只望一樣已過去嘅嘢，對我嚟講係一種風霜。對上一次去現場唱呢啲歌係19年，對我嚟講個情感價值好高，由我排呢次演出開始，有好多演員要由台北飛過嚟，我又要飛過去，每次gathering都好難得。觀眾買飛入嚟，唔係純粹睇一個播返之前錄像然後大家跟住唱就完嘅節目，而係好似一個大家一齊傾心事嘅閉門地方。」

Edward認為聽不到的聲音也同樣有力量，他分享了去年一件事。「去年我哋要重排，想搵方法去營造一種deja vu嘅氛圍，要讓觀眾聽到某些歌會有似曾熟悉的感覺。第1日喺臺北排戲時，我叫其中一個男演員帶Margaret出去，我要佢哋自製一個MV俾我。這位演員做咗件事讓我好感動，佢揸摩托返去母校，當日有學生喺球場踢波，佢帶Margaret睇返佢少年時代度過嘅地方。返嚟嘅時候，佢用手機拍攝坐喺車尾嘅自己唱歌。哇，我哋講聲音，其實唔係你聽到嗰啲，而係你聽唔到嗰啲。」

時間與空間

時間與空間都是梁祝嘅命題，十一年前Edward提出「Rethink Musical」的概念，十年的沉澱讓他衍生一些想法。

對於musical，Edward自覺只是個中學生，他做《梁祝》並非因為musical，而是因為戲曲。「我叫佢做rethink musical，同大部分musical最唔同嘅地方，係我哋用一隻流行曲album嘅概念嚟做，18隻歌表面上係唔啦更嘅。譬如你睇《大狀王》，佢成個劇其實好似一個椰菜咁，佢包住裏邊個心，即係佢嘅tone，呢個tone同佢嘅情節好有關係，而我哋就唔係咁。」

十年過後，《梁祝》讓他延伸其他想法，並且付諸實行中。「尤其係呢一年，不論從音樂角度，或從編排角度和演員角度，我開始覺得可以做三個好唔同嘅音樂劇，其中一個已經做咗出嚟，就係《一一》。第二個我同Margaret約緊，因為佢有做開和唱，所以我想佢幫手做一齣戲裡邊嘅幕後代唱。戲係講一個你知道佢係假唱嘅角色，呢個都係由梁祝一路咁行落去嘅創作。」Edward在乎觀眾透過戲劇帶走什麼東西，他覺得梁祝的一年並非是一個消費式文化活動，而是希望活動能夠引發一種自己教育自己，自己啟發自己的一種靈感。

Margaret讀大學時修傳媒學，Time and Space是必定要寫的paper。「嗰陣時寫電影音樂劇嘅time and space，點樣用落電影呢一個媒體，然後與劇場比較，究竟點樣去執行。非常林奕華嘅time and space，其實係一種抽象嘅表達手法。」

Margaret經常被人問排Edward的戲與其他音樂劇的分別，她表示排Edward的戲時不會fit in別人的time and space，而是去discover劇本內的時空。例如《梁祝》，她需要做資料搜集，究竟那個時代的人是怎麼樣的。「從演員嘅角度係一種空間，我覺得係一種加油站嘅感覺，加油站係形容演員要去output output output，但好少會有一個沉澱嘅空間俾你去感受。」

Edward提到Margaret昔日演過梅艷芳，在某個時空回看以前做過的事，其實也是返去《梁祝》中的「我是誰」，這就是成長。

「係呀，其實阿佐（鄭君熾）舊年返嚟排AI，10年之後嘅佢已經係音樂劇劇帝，佢返到嚟嘅時候話好放鬆，而我都一樣，咁係因為一班人識咗咁耐，喺一齊explore嘅時候都好放鬆到自己。」Margaret覺得10年前加入劇團的時候很在意建立自己是某一種identity，但其實好辛苦，她笑說現在則很努力護膚。（ Edward：「佢嘅情緒直接喺晒佢塊面上面，係焦慮。」）

延伸「我是誰」，Margaret講起人類圖這話題。「早前我俾咗我嘅人類圖一個朋友睇，然後佢問我知唔知自己係邊個。話自己就係邊個，我從來都唔會有一刻咁樣諗。我細個係運動員，覺得自己大個會係跨欄選手，喺中學嘅時候突然間discover戲劇。當時覺得自己怪，但因為我喺澳洲長大，澳洲戲劇班裡邊其實大家都咁怪，而你嘅怪反而係一個tool嚟。然後我走去讀law，因為覺得要做啲認真嘅嘢，然後又唔知點解返香港入咗演藝學院，然後我就坐喺你面前，嗰樣嘢從來都好fluid。」

Margaret覺得自己在這11年來都一直畫着不同模樣的自畫像。「同ELDT（非常林奕華）去創作每一個新作品嘅時候，要生出嚟都會有陣痛，但我會一直喺度同Edward講，我哋想去試啲乜嘢，總會有一班知音入appreciate，但有陣時有好多劇場送到嚟永遠就係呢一碟，佢可以好食嘅，但我要搵到「好盲盒」嘅知音，要確保我哋唔係冇思考過，出嚟嗰碟嘢，你會take away到啲嘢，對於我嚟講呢個就係空間。」

藝術的後座力來自接棒的觀眾

Edward：「有觀眾睇完之後，話活動能夠令佢忘記喺Office點樣俾人bully，坐喺度嘅人其實可能都有佢哋嘅創傷，大家有可能帶住呢啲創傷去參加唔同嘅活動。」藝術可以療癒，也是一個微妙的載體，藝術不會給你答案，但卻可以延伸無限的可能。非常林奕華《梁祝》的創作與活動就有這樣的可能，觀眾也是節目中的一部分，創作者和表演者會在節目完結後將鎖匙留下，讓觀眾繼續感受，繼續探索。

攝影：Hyman Hui & Gary Wong @電影朝聖
劇照來源：非常林奕華
場地提供：香港藝術發展局展藝館