在遺憾與失去面前，如何面對脆弱，活好可掌握的當下，或許是每個人都要經歷的人生試煉。這類題材在影視作品上是老生常談，但要說得不落俗套殊不容易。《無名指》也是這類作品，但卻有一份純粹自然的感動，當中關鍵在細節，湊在一起讓感染力發酵。這是孔令正（James）第三部電影長片作，影片萌生於他事業的低谷期，機緣之下遇上仍未有太多演出經驗的許恩怡（Natalie／Nat），拍攝時她只有18歲。早前約訪二人，雖年齡層不同，但卻感受到導與演之間的默契。

想法來自疫情時

James將《無名指》歸類為post-pandemic（疫後）電影，創作意念源自疫情時期，當時他正值事業的低潮期，本來有一部戲準備開拍，可惜因為疫情而被煞停。「我都有同阿Nat講，嗰陣想搵一個人物去鼓勵返自己，跟住就搵咗鄧辭一個咁有生命力嘅女仔出嚟。」

鄧辭是Nat在片中飾演的角色，她患上脊髓肌肉萎縮症這種罕見病。James覺得健康正常的人往往比有長期病患的人脆弱，在面對低谷時較容易逃避和放棄，他不想自己變成這樣子，所以創作了鄧辭這一個角色，注入她堅強的精神，並延伸一個關於照顧者，也繫於家庭關係的故事。

James以往作品的題材都偏向奇情和黑色，《無名指》則是他從未拍過的類型。他表示不希望重覆，每部作品都希望嘗試不同的類型。「寫實呢類題材係之前都冇諗過可以拍到，嗰一刻覺得時間好似到，人亦都成熟咗，就不如試下呢個類型。」

那年她17

James：「你知唔知我識Nat嗰陣佢只得17歲，（Nat：What！），拍嘅時候就18歲。」

James很早已寫爸爸鄧叔彥這個角色，當時已屬意郭富城來演。之後要考慮誰來演鄧辭一角，他表示這個角色於感情和身體語言都需要很高要求，但一直都不知如何找合適人選，直至有位監製好友告訴他，在一部電影中看見一位演得很好的女演員，那就是Nat，於是建議他約出來見面。

「我記得佢一入嚟就好似輻射咁樣，即係能量好多好犀利（Nat：我依家冇晒），你會好容易想講好多嘢俾佢聽，明明好眼瞓都唔知點解會醒咗咁，佢同我心目中鄧辭嗰個vibe同質地好似。當時我將天星碼頭食雪糕嗰場ending講佢知，講完之後佢已經爆喊出嚟。喺佢仍未知道成個故事嘅情況下可以咁代入鄧辭嘅角度，我覺得佢本身對戲劇一定有好強嘅觸角，加上氣質上好接近我想像嘅鄧辭，所以如果拍到就要搵佢。」

與角色的連結和距離

片中的鄧辭患上脊髓肌肉萎縮症，對當年演出經驗尚淺的Nat來說有一定難度，但她表示與鄧辭在性格上其實有不少相似的地方。

「我哋都有一種好固執同硬頸嘅性格，好注重目標，一定咗目標就會搵方法去完成。鄧辭一返屋企就要家人即刻幫佢打開晒課本俾佢溫習，我都係一樣，我返到屋企做任何嘢之前都要unpack我嘅袋，一定要執好晒先可以繼續做其他嘢，我媽咪成日都叫我唔好咁樣。另一個好相似嘅位係對屋企人特別容易唔耐煩，就好似鄧辭對佢老豆一樣。因為我好錫屋企人，所以令到我有一種expectation，希望我哋對每樣嘢嘅睇法都要一樣，但事實上唔係咁樣，即使係母女，睇法有可能會完全相反，咁其實都好正常，但我就會有啲接受唔到。」

至於距離，除了片中主角患上的罕見病外，最大的分別是與母親和祖母的關係。「鄧辭嘅媽咪都唔喺佢生活中，呢樣嘢與我好唔同，同埋佢同嫲嫲嘅關係好好，但我嫲嫲唔係住喺香港，所以嫲嫲對我嚟講都比較陌生。」

孭多啦A夢書包的編劇

電影的編劇除了James，還有《白日之下》的編劇李卓風，二人結緣於劇集《Plan B》。

「阿風係後期先加入《Plan B》嘅其中一位編劇，其實我本身唔識佢，純粹知佢係一位好後生嘅編劇，嗰陣佢孭住個多啦A夢書包同我傾劇本，我心諗呢個人咩料啊，其實佢諗嘢好成熟。」

《Plan B》的合作經歷，令James開始想寫《無名指》的時候就第一時間找阿風，最初並未有一起寫的打算，但James卻很在意阿風如何看這個故事，如何將故事講得好，如何在尊重片中罕見病患者的同時保留大家想要的戲劇效果，二人通了幾次電話之後都覺得故事很有意思，很自然地便合作起來，並砌了一個故事框架出來。

「當知道鄧辭呢條線點樣走之後，好多空間細節佢會留返俾我填返想講嘅嘢，所以合作過程好舒服。佢知道某啲位我會自己handle，例如對白或一啲細節上描寫父女之間嘅情感。佢嘅角色係幫你守住呢件事，告訴你條路應該點樣行。」

Aaron和鮑姐身上的養分

《無名指》時的Nat仍未有太多演出經驗，依足劇本小心翼翼地完成每一場戲就是她最安心的狀態。但郭富城（Aaron）卻啟發她對演出的另一種想法。

「Aaron成日會問有冇其他可能性，喺保留劇本嘅東西之餘，同時也可以將自己嘅諗法加入去，令到成件事好睇啲新鮮啲。我覺得劇本好似一個大綱，但最終都需要你去講出嚟，你可以決定最舒服嘅講法，唔使逐個字跟住劇本做，如果有另一個更舒服嘅説法都可以嘗試，唔係話一定要做，但起碼要講出嚟同導演和編劇傾，睇下大家點樣諗。」

提到「鮑姐」鮑起靜，Nat覺得她很free，在現場總帶住一種新鮮感給劇組。她認為演員沒錯需要熟背對白，但有時會容易流於為背而背而失去了新鮮感，像機械人一樣不會真正感受對白背後的意義。她覺得鮑姐的演出往往有份新鮮感，每一個take都總會有少少改變，她會帶住角色的性格去演，即使有變化，但仍能保持劇本的原意，同時也幫助對手發掘更多可能性。「你見到佢唔同咗，你自己嘅反應亦都會唔同，好多時撞出嚟嘅嘢先係最好睇，係最organic。」

講到拍攝時那種organic的狀態，James特別提到一場食飯戲。「我記得嗰場戲要求你哋拍咗好多個take，拍到你哋散晒，但我都仲叫你哋拍，因為呢場戲係好早階段拍，你哋其實仲未係一家人，所以每個人喺演出上都充滿設計，所以我覺得要慢慢一個一個take咁甩咗你哋啲設計，令你哋好organically變成一家人去食呢餐飯。」

兩場不落俗套的段落

親情的曖昧性是片中值得咀嚼的地方，特別在角色之間的衝突上，當中夾雜着愛、恨、孤獨和愧疚。我特別喜歡Aaron和Nat兩父女與梁詠琪（Gigi）「見面」一段，那種不見勝相見的含蓄，不是做戲咁做的煽情，而是自然的感動，後座力很大。Nat也很喜歡這一段的低調，同時也佩服梁詠琪的認真。

「我覺得Gigi好勁，雖然佢戲份唔多，但佢可以即刻進入角色嘅狀態。我記得Gigi自己帶咗張table自己一個搬出去坐（James：佢特登同你哋分開），喺度睇劇本同寫嘢。佢唔會嘥任何時間，嗰日食飯前得我同Aaron要拍，但佢已經嚟咗。」

這一場「見面」，其實是分開拍，Gigi看不見Aaron和Nat，需要靠記憶和想象力入戲。

James：「佢要睇晒你哋成個performance，因為你哋係一齊發生，佢一定要知道你哋做緊乜嘢。」

另一場是結尾天星碼頭一段，這也是James最喜歡的段落。「嗰場對我嘅挑戰好高，一來因為完全冇對白，縱使呢套戲都有好多冇對白嘅戲，但呢場係finale嚟，你sell唔sell到個關係就好靠呢一場戲。其實鄧辭要走已經唔係一個懸念，但到佢真係要走嗰刻你會點算呢？佢走咗之後你又會點算呢？作為爸爸呢樣係最辛苦。」

James表示拍這場戲前有不少難以預料的暗湧，他很感恩最後能超額完成這場戲。

「我唔知道可唔可以成功純粹用影像去講好呢一場戲，當然Nat同Aaron嘅performance幫咗我好多。當日我哋封咗天星碼頭一邊，你知天星碼頭有好多人，我哋仲要封咗一邊唔俾佢哋用，加上呢場戲一定要喺Magic hour發生，Nat同Aaron要食住杯雪糕望住個日落，仲要有天星小輪，嗰個要求係高到一個點，前面嘅籌備就係為咗呢一兩個鐘嘅拍攝，所以一定要完成，結果比我想象中好好多倍，我諗唔到喺咁混亂嘅環境都可以拍到一個咁personal同close嘅關係，嗰個關係就係靠呢幾個畫面去營造。即使唔算完美，但我覺得嗰一刻好似得呢個window俾機會我去講呢一場戲，而我哋把握到呢個機會拍咗出嚟。」

Nat：「我記得Kinnie（監製）同Angus（出品人）喺現場睇到喊。」

James：「你見到Angus喊！」

Nat：「佢有㗎，佢睇住個Mon。」

James還記得有一場Aaron和鮑姐的對手戲，那是鮑姐感到自己快要離開，不捨得兩兒孫的一場，他記得拍攝當日很大風，所有人在拍攝機器後面忍不住落淚，被感染的拍攝現場也是電影的magic moment。

倒數中的花園大廈

片中的主景是即將清拆的花園大廈，那是主角一家三口居住的單位。花園大樓曾記下兩位巨星的影跡，在1984年的電視劇《北斗雙雄》，周星馳飾演的自殺青年在花園大廈天台遇上周潤發飾演的社工。約40年後，這裡也記下鄧氏一家的感人故事，同時也記下這屋邨最後的時光。

James：「我哋拍嗰陣好熱鬧㗎，隔離單位仍有好多人居住。」

Nat：「好搞笑，𨋢門開，跟住佢哋見到Aaron郭富城。」

James：「郭富城又著到好街坊咁樣。」

Nat：「係呀，呢個畫面好勁呀。」

James表示主景其實屬意甘迺迪中心附近的地區，因為鄧辭的生活圈應該在那裡，但奈何劇組找不到合適的單位。

「因為罕見病患者嘅屋企需要有先天嘅條件，尺寸，床嘅位置，擺呼吸機嘅空間，間屋可唔可以俾輪椅maneuver，呢啲係需要去fulfill，如果我哋揀咗一間唔合理嘅屋，拍出嚟對病患者係一種唔尊重。」

最後在花園大廈找到一個尺寸合適的單位，可惜該單位起初的間格並不適合病患者居住，不過James很喜歡花園大廈，他看中了邨內一條上坡路，再加上該單位能遠望外邊的市區，所以他與負責美術的文念中和曾嘉碧商量，最後拆了單位的間格，重新再設計成適合鄧辭生活的空間。

拍攝期間，周邊單位仍有不少街坊居住，James分享了一件無心插柳的有趣瞬間。

「有一個shot講Aaron行過走廊返屋企，前面單位突然有人開門掉包垃圾出嚟，嗰刻掂呀，個shot即時好有生活感，於是我就順勢用咗呢個shot喺電影入面。好感謝花園大廈，佢成就咗呢間祖屋。」

面對失去 擁抱遺憾

人生總有遺憾，總有機會面對失去，遺憾為片中的鄧家塗上灰色，但卻為他們的人生衍生更有意義的色彩。James和Nat兩位來自不同世代，二人如何看遺憾？

Nat：「我覺得唔需要諗太多，學你話齋總有機會面對。遺憾已經過咗去，冇得改變，我覺得盡量唔好嘥時間去諗，呢個係一個好負面嘅cycle，反而可以利用佢去學習未來應該點，讓遺憾變成一個可以幫你成長嘅機會。控制到嘅事盡量去控制，但控制唔到就要即係放手。雖然講出嚟係容易過做好多，但我覺得係一個lifelong嘅過程，係每個人一路都學習緊嘅事，唔好對自己太harsh。」

James：「我同Nat其實都幾似，我唔係唔俾遺憾纏繞，但我係偏向往前行嘅人。我哋寫嘢嘅人都好sentimental，好鍾意搵啲唔開心嘅嘢出嚟諗，又好鍾意從中搵啲conflict出嚟，我唔想忽略佢，我會想記住佢，因為佢會對我嘅創作好有幫助，對我去明白自己同埋身邊嘅人會好有幫助。大家嘅遺憾其實都好接近，都係差唔多嗰幾樣嘢，亦都係同時間捉唔緊呢樣嘢有關，《無名指》係講緊你永遠捉唔緊時間，點解你有遺憾，點解你會做唔到你想做嘅事，點解你身邊走咗嘅人你冇講到嗰句説話，點解你冇捉緊嗰刻，因為時間對每個人都好公平，佢要走就走。我覺得要記住遺憾，遺憾就係記憶，係你自己嘅人生，你冇遺憾其實就冇你嘅人生。尤其係創作，做演員都一樣。」

Nat：「係，遺憾係記憶嘅其中一種，唔好定義佢好壞，佢只不過係另外一種experience。」

攝影：Gary Wong @電影朝聖

劇照來源：Entertaining Power Co. Limited

場地提供：Lubuds Group FWD House 1881

鳴謝：

許恩怡 Hair & Makeup

Hair Stylist: Sev Tsang @ Hair Culture

Hair Assistant: Candace Vo @ Hair Culture

Makeup: Omix