陳大利最新作品《拼命三郎》其實已蘊釀多年，早在他第一部作品《黃金花》時已有這部電影的想法。當時他很喜歡《黃金花》的英文名字Tomorrow is another day，希望將Tomorrow的主題繼續發展下去，甚至有一個三部曲的想法。《黃金花》是關於母子，《拼命三郎》來到父子，英文名叫Fight for tomorrow，並請來譚耀文（譚哥）和林家熙（Locker）兩代演員拼出一段富感染力的父子關係。電影經歷了8年，彷彿與這座城市共同經歷着艱難，將人物角色與城市想像扣連，讓電影增添另一種感受。早前特別訪問了導演、譚哥和Locker，那天我穿上了電影A Better Tomorrow的Tee，也無意中呼應了這次訪問。

阿郎

構思一個關於父子的故事，導演即時想起「阿郎」這個經典電影角色，當中延伸了兩部杜琪峯作品《阿郎的故事》（1989）和《再見阿郎》（1999），他想選用「郎」作為主角的名字，是繼周潤發、劉青雲後的第三個阿郎，所以很自然地想到《拼命三郎》這個名。「英文片名Fight for tomorrow亦都係由《黃金花》Tomorrow is Another Day嘅一個進級，明天這新的一天之後，我哋係咪要繼續向前呢？那是一個問號，整個框架就係咁樣開始。」

片中穿插了不少新聞片段呼應疫情的背景，這是導演刻意將角色與時代元素連結，特別是片中兒子石頭的角色，他特別設定為廿多歲青年，並非之前兩部的小孩。「對我嚟講八九十年代個世界淳樸好多，嗰種親情會比較簡單啲。但我呢個故仔係2017年開始構思，19年左右完成，我覺得世界變咗好多，成個社會都好複雜，所以我覺得兒子呢個角色係需要有佢嘅獨立思考，所以我將佢設定成20幾歲，係初出茅廬剛進入社會嘅年齡層。」

在三郎和石頭兩父子之間，導演也放自己的幕後身份進入其中，是夾在兩代人之間的第三代人。「我係一道橋樑去串連兩代，藉此講新舊交替，一齊去探討明天呢個題目。」

三郎

導演與譚哥相識於《葉問》系列，但譚哥的演技和一直以來的努力已一早烙在導演心中，希望有機會能夠合作，直到拍攝《張天志》的時候。「嗰日開夜班，當時我係編劇跟場，冇咩做就匿喺帳幕裏面做秘撈，突然間有人撞入嚟，原來係阿譚，跟住我哋喺度傾閒偈，但嗰刻個腦突然click咗一吓，佢就係拼命三郎。之後好快就約監製Edmond（黃子桓），佢當時已經口頭應承阿譚做三郎。」當時的劇本與現在有很大不同，但唯一不變的是以明天為主題，是關於父子關係的故事，還有譚哥飾演三郎一角是一直未變過的。

三郎一角，無論是刻意還是無心插柳，毫無疑問是為譚哥度身訂造，這是一個需要有一定人生歷練的角色，譚哥的背景和經歷儼然就是角色的最佳準備。「其實好得意嘅，好多角色其實你一路都準備緊，你做緊人嗰陣其實準備緊好多角色，關鍵係你記唔記得將嗰一part抽出嚟放落角色入面。」

譚哥坦然當時正值中年危機，子女開始長大，壓力也隨之而來。再加上社會經歷變動，還有疫情，令他有不知如何是好的狀態。縱使他在疫情期間仍有戲拍，但他不知道條路如何走下去，這是他從來未有過的感覺。

「我19歲入行，一路都好清楚自己條路應該點行，包括我唔唱歌暫時去咗演戲，跟住去咗內地一段時間，跟住覺得又係時候要返嚟香港，睇返轉頭，我自己係好清楚知幾時要做乜。從50歲開始就有呢啲唔知條路點走嘅感覺，加埋3年嘅疫情，就令到我有啲唔睇好自己將來仲有啲咩成績可以做出來，當時喺屋企露台對住個天好擔心，喺屋企人面前梗係唔敢表露出嚟。就喺呢個時候遇到三郎一角，我於是試吓將呢種感覺放落角色入面，又真係得㗎喎。」

他強調要捨棄，要放下昔日風光的包袱，或者是以往慣常的概念，重新看看自己如何重生。「重生之前一定好痛苦，要經歷難過嘅日子，心靈上嘅憂慮。」放下並不代表要全盤否定過去，特別是一些精神價值，在三郎身上是沒有變的。「三郎呢個角色俾到我嘅係，其實自己知已經唔得，但又要死頂又要執著，佢深信以前有啲嘢係好嘅，佢想將佢留低。」

導演特別提到譚哥經常會給他驚喜，他在剪片的時候發覺譚哥每個take都不同，這是現場看不見的，要到剪片室才能慢慢享用。「我後嚟研究返，佢每個take都唔同，其實佢喺度搵緊嘢，佢試緊俾啲唔同嘅嘢你，我剪片嗰陣好開心，因為不停有好多選擇，不停有驚喜。」

石頭

石頭這個角色一開始就想找新演員來演，因電影想說一個新舊交替的故事，希望在選角上也有這個意思。起初公司考量到流量因素，屬意在Mirror內找一位團員飾演，最後選擇Ian，導演覺得他最有石頭的特質，但他後來因紅館事件而退演。當時劇組已埋班，而石頭是片中非常重要的角色，所以在臨急臨忙之下再進行casting。當時導演cast了很多演員，直到Locker的出現，他心中那塊石頭終於可以放下。

「我冇接觸過Locker，但我認識這位演員，當時我cast佢第一個印象就已覺得中咗八九成，原因係佢染咗一頭金髮。我構思石頭呢個角色咁耐，都冇諗過呢個形象，對我嚟講係衝擊。跟住就係試戲，第一樣試動作，因為角色需要打泰拳，呢一部分佢非常靈活，起碼睇落去覺得似，再加上當時佢著咗件鬆身嘅hip hop衫，所以仲未知佢咁大隻。第二樣試一場父子重頭戲，當中牽涉好大嘅情緒，我覺得佢唔止做得到，直頭係好，覺得已經由八九成去到中咗十成。」

只有三星期準備的Locker表示起初對角色無從入手，他嘗試從日常生活中進入角色。在那三個星期中，他一早起身練拳、做gym，控制飲食，透過這種生活狀態進入石頭的拳手角色。至於與譚哥的父子戲，他第一時間想起自己與家人的關係。「我同屋企人相對上少溝通，我嘅性格係唔會主動同佢哋分享，佢哋亦唔會主動問我，所以我捉住呢樣嘢去演成部戲，開頭都唔知咁樣得唔得，但我的確係有感受嘅，拍拍吓就開始掌握到點樣演。」

Locker特別提到酒樓的一場戲讓他有很大的體會，那場戲講他父親與母親和後父的衝突，他在該段中靜靜坐在一旁，但卻處於複雜的情緒狀態。「我嗰日feel到好大好大嘅力，係個石頭裂咗，我第一次有咁嘅感受。」譚哥也大讚Locker在這一場的表現，他的反應撐到成場戲的力量。

父子

父子關係是電影的重要元素，導演在開拍前先介紹譚哥和Locker互相認識和溝通。譚哥本身有子女，但他較少從自己的經驗去揣摩與片中兒子的關係，因為他的兒子年紀較少，在溝通方式上是不同的。他主要從劇本的文字中探索，從了解Locker的過程中探索。「原來佢哋年青人係咁諗嘅，佢而家喺呢一行面對緊乜嘢困苦，我哋有出嚟飲過幾次，男人嘅嘢好快，大家又係同行，所以分享咗好多，到埋位嘅時候大家已有默契。」

在現實生活中，Locker與父親從小到大都像朋友般，除了自己做錯事的時候，父親從來都沒有給他長輩的感覺，譚哥給他的感覺也是一樣。「開拍前我同譚哥約咗幾次出嚟傾偈，話題並唔係關於劇本同點樣演，而係好似朋友咁傾偈，你點入行呀，你鍾意啲乜呀，friend嚟㗎喎，啱傾㗎喎，帶住呢種了解喺拍戲嘅時候就好有安全感。套返落片中嘅石頭同三郎兩父子，當二人破咗冰之後其實就好似朋友咁相處，我印象最深刻係兩父子喺天台一齊玩同training嘅段落，嗰種bonding，我覺得係朋友多過父子情。」

導演表示特意讓譚哥和Locker二人保持一點距離，因為片中的石頭和三郎一開始就有份疏離感，讓他們在拍攝的過程中沉澱出父子情。「同拍《黃金花》時分別好大，毛姐（毛舜筠）同小龍（凌文龍）係好密集嘅溝通方式，譚哥和Locker互相識吓啱啱夠就得，喺拍攝過程中隨住劇情發展就會自然有化學作用。」

旺角

導演強調環境是電影的角色，所以在他的作品中都會看見地理元素在發揮影響力，《黃金花》是大埔，《拼命三郎》則是旺角。

《黃金花》的主要角色是屋邨師奶與她的自閉症兒子，導演在屋邨成長，他所理解的屋邨是鳥語花鄉的世界，某程度和師奶掛鈎，那裡也常見有特殊需要的人。大埔有符合他需要的公屋場景，加上有河，所以最後選大埔作主景。到《拼命三郎》，從屋邨世界來到一個龍蛇混雜的江湖，導演第一個想到的地方毫無疑問是油尖旺，將環境與人物融為一體呈現一個有質感的故事。

「我喺嗰度成日都會蕩失路，那裏有一種混雜同石屎森林嘅質感，所以我揀咗故事喺油尖旺發生，再加埋啲霓虹光管，其實好屬於三郎，佢應該喺呢個環境之下發跡，而另一個新衝擊就係石頭，佢進入之後成個戲嘅tone有返一種陽光啲嘅感覺，佢都係屬於九龍。」

歌曲

電影的主題曲讓人記得譚哥除了是一位出色演員，也是一位唱得之人，第七屆新秀歌唱大賽冠軍，很久沒有推出Solo的他，這首歌別具意義。這首歌也是導演首次填詞，他曾經想過故事是關於一位歌手，主題曲也一早鎖定由譚哥主唱。「我真係唔識音樂，音樂旋律係阿Day（戴偉）和阿譚去溝通，填詞我係臨時上陣，突然間有feel就填吓，裏面個大方向係用三郎講香港，呢部分我input多啲，但去到一啲較個人感受嘅詞，有部分其實來自阿譚，例如「再拼過也未算多」就係佢填。」導演不斷強調自己不懂音樂，填詞時會上網找尋關於押韻的參考資料，亦反覆將寫好的詞給阿譚過目，看看寫出來的音調是否啱音，因他在這方面是專業。

譚哥表示這首歌所講的拼命三郎可以是一個人，也可以是大家，這首歌如何讓電影更立體，唱的人很重要，要carry到拼命三郎這四個字。「我有一段咁長嘅經歷，我覺得自己某程度同個角色係syn嘅，唔係講唱得幾好，係講syn唔syn到成件事。」

導演也同意拼命三郎並不只是一個人，歌詞的內涵其實可以放到很大。「我想貪心啲講香港嘅某一種狀態，希望佢係一種精神，講兩代人如何修補關係。」他強調喜歡主題曲在最後的roller中播出，因為歌曲某程度是電影的另一個總結。「睇完成部戲百多分鐘，最後由阿譚唱返首歌出嚟，由歌詞去講返件事，我覺得個意義好大。」

堅持

正如導演和譚哥提到拼命三郎並不只是一個人一個角色，當中延伸的是一種精神，就是片中三郎給石頭的話，「堅持、志氣」，這亦同時可套用在戲外的導演、譚哥和Locker三人身上。譚哥自新秀冠軍後經歷高低起跌，走到現在殊不容易；Locker首部演出的電影《點五步》也快十年，這十年的香港電影工業不斷在黑暗中找曙光；導演第一部參與的電影是2004年的《墨斗先生》，後沙士時期，充滿不確定的前景，三人分別代表着三代香港電影人，他們何嘗不是在這些年顛簸的電影路上拼命，三郎在桑拿所說的「堅持、志氣」，其實很有重量。

導演表示最打動他的是一種永不言敗堅持到底的角色，因為他們積極，能迎難而上。他覺得真實世界很痛苦，能夠在戲院中看到這些角色很有鼓勵作用，亦能潛移默化自己。「從《墨斗先生》開始到現在已20年，期間不停諗過放棄，但係又唔甘心，尤其你覺得做到少少嘢出嚟，放棄就冇晒之前嘅堅持。我真係試過放棄，直頭係冧檔，到頭來都係做返電影，咁咪唔諗咁多囉，繼續做，踏踏實實去做，去到《拼命三郎》就將一路累積落嚟嘅嘢化成創作，用tomorrow呢個主題建構三郎，當中其實都潛移默化咁放咗自己嘅個性、人生觀或世界觀喺戲裡面啲角色入面。」

Locker表示他一定要堅持，因為冇得唔堅持。「諗返《點五步》之後呢10年，其實我都幾拼，我連入行簽公司都係自薦咁拼返嚟，原來我曾經咁大膽咁搏命想入行。入行之後都試過冇戲拍，亦都想過放棄，但係儲落啲經驗之後，有陣時又會有啲嘢返嚟，咁呢啲小甜頭又會覺得自己好似仲得，覺得自己應該啱呢行，應該有天賦喺度。慢慢累積，到10年之後就遇到呢個角色，我覺得係值得嘅，亦印證我拼命係有用嘅。」

譚哥說他一直渴望有一部飽滿的電影，他望着導演說終於有了。「找演員嘅過程好艱辛，有好多人推咗，當時真係好困難，諗返起都幾拼㗎，原來你想做一件開心嘅事唔係想像中咁易，然後一關一關咁過，中間都爭啲放棄過，係導演佢堅持。跟住有Locker出現，我好需要有《拼命三郎》呢個作品之餘，咦，原來Locker都好需要呢個角色，細貓（應智越）亦都好需要呢個角色，佢哋需要喺呢個圈裡邊有啲轉變，加加埋埋就令每個人都嚟咗呢部戲，打開咗道門薪火相傳，拍嗰陣愈來愈有火，發現大家好有默契，呢道火令我哋完成咗部戲。」

導演特別提到電影最後一場是他最想表達的訊息，當中的構思來自意大利新寫實電影經典《單車竊賊／單車失竊記》（Bicycle Thieves）最後一個鏡頭。「最尾嘅shot係老豆俾人打完之後，阿仔拖返老豆隻手繼續行落去，呢段表達兩代人嘅一個融合，繼續走落去就有希望。我將呢個概念放入最後一場醫院戲，父子關係由開始嘅惡劣，反反覆覆到最後嘅和解，嗰個先係我講緊嘅tomorrow。」

希望

《拼命三郎》與《黃金花》一樣，導演作品的角色縱使坎坷，但最後都會見到陽光和希望，這亦反映他的創作宗旨和信念。「呢個牽涉到深層次嘅信念，作為一個電影人，我會傾向電影帶出嘅訊息係導人向善，但我堅持唔可以太廉價。我覺得成個世界都係悲劇嚟，喺嗰100分鐘嘅觀影過程中，你要話俾聽眾聽，痛苦之後你點繼續行落去，要帶住一個乜嘢嘅態度，最後永遠都會有一點光出現。」

Tomorrow never knows，路要行下去才會有機會見曙光。

攝影：Gary Wong @電影朝聖
劇照來源：東方影業