《柴灣電影會》是今屆微電影「創+作」支援計劃（音樂篇）的入圍作品，電影由丁健峰（阿峰）身兼監製、導演和編劇三職，故事講述「柴灣電影會」面臨迫遷，會長丁叔（張雷 飾）縱有不捨也要放手，兒子明偉（張明偉 飾）也作了人生重要的決定，眼見滿載回憶的電影會即將消失，決定與伙伴們舉辦一場別具意義的告別儀式，以新方式讓電影會傳承。電影的主場景柴灣是阿峰成長的地方，巧合的是主演「雷哥」張雷也曾在柴灣度過年少時代，藉着電影的緣份讓兩代柴灣人走在一起。早前相約二人回到柴灣，在他們滿載回憶的地方散步，談談電影，也分享二人的柴灣故事。

十五座 玄都巖

「剛才我泊完車行過嚟，後面有人叫我，喂，你今日返嚟柴灣啊，我話係啊，我當然唔係好認得佢哋啦，佢可能睇電視認得我係張雷囉。」

在訪問期間，不時有街坊與雷哥打招呼，起初不以為意，以為只是純粹看見明星打個招呼而已，但之後發覺不是，街坊竟說得出那些年15座的往事。15座即柴灣邨重建前的徙置區，是雷哥的舊居。那種鄰里關係，可以超越時間，這種感覺就是一個社區最重要的靈魂。

阿峰笑說拍攝《柴灣電影會》時，雷哥不用埋位時都會與街坊吹水，那時很好奇他相識滿天下。後來知道雷哥不認識他們，或許是街坊認得他，又或許這區給他一份獨一無二的親切感。

「柴灣好得意㗎，好有人情味，嗰日拍戲好多舊街坊行過，咁多年嚟返嚟拍兩日，啲街坊行過嚟同你打招呼，又傾吓啲舊事。」

昔日雷哥曾在15座旁的玄都巖教功夫，那時山上有間廟宇，他就在廟前的空地教拳。廟宇現在重修了，也新建了些建築。

「現在間廟好靚，以前好荒蕪㗎，廟前有個大空地，我咪喺度教拳囉，教教吓佢見到我咁多學生，就同我講喺呢度教拳唔係幾啱，我建議不如代表你哋廟教啦。後來我搬咗去青年會教，嗰陣時青年會係俾啲細路去玩嘅地方，佢哋有啲類似柔道墊借俾我哋，就咁教咗一段時間。」

漁灣邨

漁灣邨是《柴灣電影會》的主場景，片中的電影會就在邨內的柴灣漁民娛樂會取景。漁灣邨是阿峰成長的地方。

「我住在漁豐樓，一出世就住喺度，讀書都喺度，伊斯蘭脫維善紀念中學就係我讀嘅中學，郭富城係我校友。我一路就喺度成長，後來又好有緣分返嚟柴灣工作（明周），嗰度亦都係我學識好多嘢嘅地方。」

阿峰近年特別喜歡柴灣的樹，長得很高很美，種類繁多，與社區的格局配合得好。

「啲南洋杉好靚，喺地鐵望落嚟好宏偉，好似有幾兄弟排咗喺度咁樣，所以《柴灣電影會》最後特別有一段航拍空鏡，記錄柴灣嘅綠色同埋建築物嘅分佈，仲有海，我哋依家坐緊呢度（柴灣公園）都係填海得返嚟㗎。」

電影其中一個重要場景是巴士，當中連結到阿峰的父親，片中由雷哥飾演的丁叔就是他父親的投射。

「我爸爸以前係泥頭車司機，後來又揸埋巴士，佢就係以前80號頭班車嘅車長，丁叔絕對係有我老豆嘅影子，片中其中一個街坊就係我老豆。」

屋邨的另類情懷

柴灣提供了阿峰成長的養份，當中還包括一些膽戰心驚的回憶，那些年的屋邨多姿多彩，但品流也相對複雜，路上針筒和球場惡霸都是昔日屋邨的另類「情懷」。

阿峰說最雜是興華邨，依山而建的興華邨與葵盛邨的格局近似，有大型升降機和長長的天空走廊連接各座和道路，這亦是一個讓古惑仔或不法之徒埋伏的合適空間。

「興華邨以前好雜㗎，地下周圍都見針筒，好多飛仔，搭lift上去，一出lift就有人喺度捕你㗎。嗰度啲學校都比較差，以前啲家長揀學校都唔會揀嗰度。我發覺通常地理環境愈複雜嘅地方就愈多惡霸聚居，例如《嚦咕嚦咕新年財》嘅祖堯邨。」

雷哥回想他的屋邨歲月，那時好興踢人入黑社會，經常見人開片，人多勢眾，像拍戲一樣的畫面。

「我哋純粹喺樓上睇熱鬧，佢哋一條龍咁行出舊區，那時我哋叫20幾座做舊區，即係戲院（現在的戲院大廈）對面，我哋15座係新區，每一座都有唔同單位，呢座係咩字頭，嗰座又咩字頭，一區又有一個總字頭，一唔妥呢，就新區劈舊區，舊區劈新區咁樣，所以少人係唔敢出嚟，肯定俾人捉，一隊行出嚟就有威勢。」

阿峰說他成長的年代已沒有雷哥那時的狼死，但一般的欺凌都老是常出現，在球場上凶吓你省吓你，他笑說踢波的腳法和跑步的速度就是這樣鍛練出來。

李小龍 張徹 菲林組

雷哥十幾歲開始學功夫，年輕時也常到柴灣戲院看電影，阿倫狄龍、查理士布朗臣的西片讓他印象深刻，他的二撇雞標記正是受二人的銀幕形象影響。

功夫x電影，兩者的結合讓他產生入行的興趣，後來報名參加龍虎武師演員訓練班，成為千人中脫穎而出的二十位學員之一。「嗰陣時啲同學仔都識功夫㗎，唔係空手道幾段就係跆拳道幾段。」

訓練的地方在灣仔電車路附近，任教的不乏知名的武術演員。「喺度教嘅有魯俊、巴山、林蛟，還有三妹姐，佢而家叫元秋，以前叫林秀，佢嚟示範吓威吓，教係由其他導師負責。」

影響雷哥的當然有李小龍，他初入行時還有幸參與龍哥的《龍爭虎鬥》劇組，縱使只演一個小角色。

「我係企喺好遠嗰啲龍虎武師，前面同李小龍打嗰幾個有正英（林正英）、三毛（洪金寶），我哋喺後面揚吓揚吓，一action前面打後面就「哇哇哇」。我哋聽見李小龍個名都興奮，何況見到佢拍戲。」

雷哥入行初期跟過張徹導演的劇組工作，當年張導演確是派頭十足。「嗰陣邵氏片廠冇冷氣，鐵皮屋日頭好曬，要下晝先拍得，三四點開始打燈到天黑，嗰陣熱氣冇晒先入廠。全個邵氏得張徹一個有冷氣，冷氣係手提嗰啲，仲有一個痰盂，佢一路食雪茄，有個副導演請嚟俾佢鬧，爆晒粗，咬住支雪茄係咁鬧。但佢唔鬧演員，因怕佢哋冇晒信心就演唔到英雄。張徹對我好好㗎，後來拍《C.I.D.》佢都讚過我，好開心㗎。」

做開龍虎武師的雷哥，機緣巧合兼任演員，當時正值TVB最有活力的時期，創作上容許很大的可能性，由周梁淑怡主導的菲林組孕育了一班電影新晉，拍攝一系列在內容與拍攝手法創新的劇集，《C.I.D.》系列是其中之一，而雷哥飾演當中叫阿森的警探角色，劇集當年大受歡迎。

「當時朱克叔搵我試吓，做吓指導又做吓戲，到開《C.I.D.》，即係譚家明同葉潔馨嗰陣時，監製搵咗我同任達華試試，睇吓得唔得。我同華仔喺邵氏已經認識，佢係邵氏舞蹈組，學跳舞嘅（笑），我哋以前拍完戲經常一齊出去玩，嚟到TVB又撞到佢，又一齊錄用咗，咁咪熟上加熟囉。」

當年菲林組的編導猛將如雲，有譚家明、許鞍華、羅卡、嚴浩、章國明、吳小雲等，當中不少在外國浸過咸水，帶了不少新衝擊給電視製作，他們後來也成為香港電影新浪潮的中堅份子。當時雷哥與這些編導都是年青人，與他們合作有火花之餘也學到很多東西。

「 《C.I.D.》係菲林組，嗰啲菲林係細盒嚟㗎，細盒400尺，大盒就700尺。我哋走去睇剪片，啲菲林掛到成幅牆都係，睇剪片都學到嘢㗎，學到點樣做法和新嘅idea，還有鏡位，咩shot要，咩shot唔要，對我後尾做指導都有幫助，做武指有時都要包埋剪片。」

飛車特技

雷哥在八十年代曾組織特技車隊，就像現在錢家班的飛車組，規模有過之而無不及，在八十年代泡製過不少影迷熟悉的飛車場面，當中包括《最佳拍檔》、《毁滅號地車》、《八彩林亞珍》的經典段落。雷哥本身也鍾情飛車，寓興趣於工作，讓他的電影事業開拓另一種可能性。

「做咗演員一輪都幾悶吓，嗰陣時覺得成日都係做警察，現在覺得冇所謂，曹達華都係銀壇鐵漢啦。細路仔鍾意新鮮，又要我做警察，又係C.I.D.，覺得悶悶哋就玩咗飛車。睇《Condorman》、《Mad Max》嗰啲戲觀眾喝晒彩，呢啲鬼佬先得嗎？唔係喎，我都好似得㗎喎，我做武術指導，又識啲鏡位，同啲導演吹下吹下就拍啦。」

經雷哥手操刀的飛車特技有八十年代屢破票房紀錄的《最佳拍檔》系列，還有霍耀良執導的《毁滅號地車》，那是劉德華首次做主角的電影，片末在新落成的黃金商場飛車最讓人津津樂道。

「霍耀良套地車，華仔做主角，我幫佢做指導兼飛車，要衝入黃金喺二樓飛落嚟。黃金嗰陣啱啱開，有位借到俾我哋，夜晚拍通宵一晚搞掂。」

還有《八彩林亞珍》，片末玩味十足的隧道大炒車很經典，雷哥除了當飛車指導，也臨時拉伕飾演一名縱火狂徙。

「條隧道喺黃埔船塢搭㗎，就係現在隻船嘅位置，嗰陣係爛地嚟㗎，仲未有黃埔花園。喺嗰度搭條轉彎嘅隧道，轉彎係要避穿崩。我喺嗰度反咗架寶馬，後尾法國飛（吳宇森）見我哋飛車咁犀利又咁過癮，佢加咗啲嘢俾我，叫我演一個角色，我話冇所謂，演囉，就咁整條傻佬出嚟，係突然加㗎咋，佢啲諗頭好犀利，拍嘢好叻，佢可以同你補充好多嘢。」

兩代柴灣人的緣份

《柴灣電影會》讓雷哥和阿峰兩代柴灣人結緣，但阿峰選角時並未知道雷哥和柴灣的連結，而是因為一個巧合的相遇。

「有一次我去尖沙咀美麗華商場搵朋友，佢喺商場賣皮鞋，佢喺出面煲煙，我陪緊佢嘅時候見到雷哥行咗出嚟，煞有介事咁喺度搵嘢，我唔知佢搵咩，行嚟行去來來回回三四次，呢一幕我印象好深刻。我以前對佢嘅印象就係金輪法王，但喺美麗華見到佢好似幫緊人搵嘢好著急咁樣，我覺得當刻雷哥就有一種幫大家謀福利嘅感覺，係會替人擔心嘅一個眼神嚟，就係嗰啲眼神，所以想搵佢演出丁叔一角，我嗰陣已經有《柴灣電影會》呢個故仔。」

二人合作過後，雷哥在阿峰的印象已不再是金輪法王，而是一位既慈祥又樂於提攜新晉的前輩。

「佢嘅笑容和眼神好慈祥，呢種慈祥好難解釋，但係我每次見到都會心頭一暖，一個笑容勝過千言萬語，一個點頭就有一種「得啦，我幫你搞」嘅感覺。佢有一種壓場感但唔係要挫你銳氣嗰啲感覺，你feel到佢係想諗辦法幫你。」

阿峰說雷哥很懂閱讀人，做演員做人皆有一定功力，他提到拍攝《柴灣電影會》期間，雷哥會在過程中做了些手腳，讓整件事來得順暢。

「佢會閱讀到拍攝時嘅氣氛，即係知道你諗緊計，佢會配合返俾你。我剪片嘅時候發現到好多細節，係雷哥送俾我嘅，佢幫我接咗好多嘢，同埋佢知道我要啲咩。」

他就是足球述語中的通天老倌。

雷哥近年與不少新導演合作，當中有不少火花，例如早前的劇集《老是常出現》就是其中一個例子。雷哥表示他仍需要一路做一路學習，觀察新導演的處事方式。「合作係一路磨合，大家研究吓傾吓，瞭解吓佢嘅心態和做法，我好少阻礙佢哋嘅拍攝，佢有自己嘅諗法㗎嘛。」

阿峰特別提到雷哥喜歡閱讀，涉獵的知識很廣，電影的點題「成住壞空」正是雷哥的分享，那是來自佛教中的智慧名言，意指世上萬事萬物皆有過程，呼應電影中結束和開始之間的微妙關聯。

電影精神 有文有路

認識阿峰是他在明周的時候，那時他負責一系列以《電影大道》為名的訪談和活動，是一個沒有嘩眾取寵，踏實地追求紮實內容的系列。早年阿峰毅然離職，創立有文有路，繼續那股電影精神，也嘗試探索其他可能性。《柴灣電影會》中的明偉彷彿是阿峰的自身投射。

「我冇刻意咁做，不過有少少將自己嘅經歷擺落去，譬如主角工作環境嘅轉換，之後電影會要消失呢樣嘢。細個會覺得轉變係好大件事，但係你去到某一個階段，轉變係必然嘅，係你生命裏面必須發生嘅事，冇得話捨棄或者留戀以前，因為個環境唔容許你咁樣。」

阿峰去年在明周離職，但蘊藏這決定已有相當時間，因為他想趁早實踐他一直想做的工作，他明白到若不果斷抉擇，任何事也做不成。

「我喺明周學到好多嘢，亦都俾到我一個較為穩定嘅工作，我亦相信會逐級逐級上去做一個top management，但係我唔想咁，我唔眷戀一個穩定嘅職業，我反而想快啲去做自己想做嘅電影。」

去年女兒的出生也堅定了阿峰的選擇，心態上也豁了出去。

「結咗婚諗法又唔同咗，我覺得現在似乎係一個好時機，女兒再大啲可能真係放唔低。你見我依家其實去盡咗，以前我搵張雷大哥可能左度右度，擔心佢應唔應承呢？我依家諗都唔諗打個電話俾佢先，跟住第2日我哋就出去飲咖啡嘞。所以，有啲階段嘅取捨係必須嘅，《柴灣電影會》嘅製作過程讓我引證到呢件事。」

創作者要Keep住每日重新

要營運一間初創公司，想必會遇到大大小小的困難，特別在近年低迷的市場氣氛之下，更需要花多一倍心力。阿峰覺得辛苦是必然的，也是應份的，他強調更加要想多一些新方法去應變。

「無論係拍戲嘅方法，sell橋嘅方法，做media去傳遞內容嘅方法，我覺得都要新嘅。好似我哋做一個電影人訪問，大家都係講呢啲㗎啦，但我哋點present到大家都覺得好睇，然之後再睇你個page，反而我會諗好多新嘅方法。」

創作者在不同階段都要面對不同的壓力，甚至是挫敗，當中有沮喪，但從中能挺過去的，得着會自然而來。心態重於一切，阿峰認為一個好的創作者，應該有一個強大的心臟應付挫折，要Keep住每日重生。他表示《柴灣電影會》給了他信心，因為過程中不斷的挫折讓他要持續地想辦法解決問題，這是相當珍貴的經驗，還有時機，要相信自己所做的東西。

「返去有文有路嘅片，唔係每一次都有人睇，但我發覺若做到啲好嘢，讀者係會返睇嘅，即係你上一個月寫嘅post，若今個月觸動到佢，佢會睇返。所以相信就會有曙光，我一直都證明緊呢樣嘢。」

後記

與雷哥和阿峰在柴灣散步，不亦樂乎。特別與他們一席話，對我來說啟發良多。二人良好的處事心態和泰然自若的生活態度是一種難得的智慧。最後我問雷哥，在人生中有沒有遇到挫折，他直截了當說沒有，他說自己的生命很完滿。我不相信人生中沒有挫折，但關鍵是如何看待挫折，一念天堂，一念可以是地獄。雷哥食齋超過三十年，他尊重所有生命，相信善因可種，智者仁心。

攝影：Gary Wong @電影朝聖

劇照：有文有路