重建，在城市發展過程中往往成了失去的代名詞，社區改頭換面，昔日的質感已不再，相熟的面孔也不見。電影能留住光陰，記錄了某個時空的景物、人情和故事，在重置回憶中看見珍惜。電影《紅豆》以九龍城的重建作切入點，在變遷當中呈現人情，景物會變，人情卻是永恆。電影是鄒穎（Vincent）的首部長片，是他對成長地的情感投射。

電影如何開始

變幻原是永恆，套用在香港是讓人感觸的說話。突如其來的變化讓人措手不及，這處境讓Vincent感觸良多，特別是近年不少老舖相繼結業，偶然間看見一個專訪，讓他萌起創作《紅豆》這電影。

「專訪關於一位夢想當空姐嘅女仔，夢想成真後遇上屋企嘅餐廳結業，佢唔想家業就咁shut Down，於是就辭職返去幫手，由唔識煮餸開始到後來間鋪好多人排隊幫襯，心想不如講一套關於傳承和父女情嘅電影，慢慢就發展成《紅豆》。」

Vincent是資深廣告導演，多年前也拍過劇情短片，《紅豆》是他第一部長片，豐富的拍攝經驗讓他放下緊張，但與拍廣告相比，劇情長片是兩樣截然不同的事。

「廣告係拍product為主，product就係主角，even你有粒星喺度。但係電影唔係，電影係講drama、人物和感情，縱使都係用緊同一部攝影機或同一隊crew，但拍嘅內容係完全唔同。」

Vincent表示拍攝《紅豆》的過程讓他有新鮮感，「像我哋平時飲開奶茶，突然間有杯鴛鴦，內容同之前差唔多，但加咗咖啡係有啲唔同，有少少衝擊。」

紅豆的兩個意思

「紅豆生南國，春來發幾枝？ 願君多採摘，此物最相思。」（＜相思＞王維）紅豆又叫相思豆，電影顧名思義借用紅豆喻對家人的思念。

「劇情講到媽媽走咗之後，屋企人對她的思念，我覺得紅豆呢個名講到個古仔，表面講紅豆沙，內裏再深一層嘅意義係講家庭關係。」

英文片名沒有直譯，用Little Red Sweet語帶相關道出父女情，這是電影另一個主題。

「Little Red Sweet其實講緊爸爸對個女嘅心聲，他表面好似唔care個女，其實內心好愛錫佢，女兒喺爸爸心目中就係Little Red Sweet，小甜心咁解，我覺得呢個名幾有意思。」

潮州人

片中的張家是潮州人家庭，潮州人傳統上重男輕女，片中任達華飾演的父親是當中的典型。Vincent並非來自潮州人家庭，但有個由細玩到大的潮州人朋友，讓他了解潮州人家庭的特徵，片中也有刻劃張家的飲食習慣和生活細節，呈現了潮州家庭男尊女卑的傳統，其中有一個鏡頭看見了細節，爸爸隨手將食剩的東西丟在地上，飾演女兒的鄧麗欣Stephy自然地幫他執手尾。這細節看似過份，但在潮州家庭長大的我來說實在有親切感。

「有一段flashback，飾演母親的龔姐懷第一胎，華哥嗌肚裡的孩子做成業，嗰陣佢仍未知係仔定女，代表咗佢想要仔多啲，雖然結果係女，但佢都會接受，但之後都會追返個仔，呢啲係潮州人根深蒂固嘅性格。」

不過，在大男人那叫面子的外衣下，骨子裡也疼愛自己的骨肉，像片中任達華與Stephy的父女關係，不懂表達的父親與委屈的女兒，那是潮州人帶矛盾的至親關係。

選角

Vincent透露電影原本有一個臺灣人角色，由一位有相當份量的臺灣演員參演，可惜在開拍前該演員患上Covid，角色也因此作出更改。至於其他主演，Vincent與魏浚笙Jeffrey在拍廣告時已結緣，其他主演則是初次合作。

片中的父女一早屬意任達華和Stephy演出，二人看了劇本後很快就答允演出。最初安排了圍讀，Vincent表達了對演員的要求，強調不會給演員太多的框架，他希望演員消化沉澱後用自己的方式呈現出來。

「我覺得佢哋消化完劇本，代入咗個角色，佢哋已經完完整整成為角色嗰個人，仲有可能俾到input我。所以我冇特別去改佢哋某啲性格或者小動作，只要令我信服，我會開綠燈照去。」

九龍城情意結

「我讀電影嗰段時間有個同學住喺九龍城，我經常去佢喺天臺嘅屋企，真係經歷過一架飛機喺頭頂飛過嘅時刻。嗰個畫面，嗰個聲音，嗰個moment太impressive，所以我都擺咗個畫面喺套戲入面，感覺好signature。」

Vincent希望他第一部長片可以拍他成長的地方香港，而九龍城是香港的縮影，多元文化，新舊交替，還有昔日的啟德機場，都是具標誌性的地方和元素，所以他決定以九龍城為故事背景。

電影在九龍城拍了不少空鏡，有街景和老舖，Vincent特別提到一間位於樂口福對面的舖頭，那是片中馮素波和方平的店舖。

「老舖屹立喺九龍城好耐，佢係賣衣車嘅，屬於其中一位幕後人員屋企，喺嗰度拍咗幾個鏡頭，設定華哥間糖水鋪喺附近，每朝華哥都會經過。」

市區重建局早年相繼公布九龍城區的大型重建計劃，在社區被改頭換面之前，這套電影特別因此留下記錄。「我覺得係嗰個感情，如果你喺九龍城長大，見到呢個社區慢慢變化，細個經過呢度有牛雜賣，現在都沒有小販了。」

重建也可套用在電影中的父女關係，女兒縱使對父親的重男輕女有鬱結，但當家有需要時，她都會甘願放棄理想返家幫忙，為的是要承傳父母的夢想。人與社區，父親和女兒，兩者的感情連結都是一樣。

值得一提的是片中的主景「張興記」其實是在清水灣製片廠搭景拍攝，該片廠也將會拆卸改建，電影也見證了片廠最後的時光。

「其實我哋有諗過喺九龍城搵間真糖水鋪拍攝，或者搵間吉鋪再陳設，但在組數和時間上未必容許，衡量過各種原因後決定喺片場搭景。」

景物會變 人情卻是永恆

Vincent認為社區進步，重建是必然。正如片中講到，地方並不是最重要，人才是重點。重建可以有很多可能性，從人的生活角度出發，保留那份屬於街坊的人情味。

「傳統糖水係其中一個例子，其實仲有好多屬於香港嘅特色都可以保留，唔係清拆咗之後全部都係Sogo或Times Square一色一樣嘅地方。好似九龍城龍珠商場，呢類街坊商場重建後應該唔會再有，呢啲咁細嘅商場，其實都係代表一個小區嘅味道，其實我希望住嘅地方會有啲小商場rather than一落街就係大商場，兩樣都可以並存就最好，若香港19區都一模一樣就沒有特色了。」

攝影：Gary Wong @電影朝聖
劇照：洲立影片