一套電影擱置了8年，業內業外不少人都以為公映無望，但近日有一套擱置了8年的電影重見天日，電影原名叫《電影痴漢》，其後再改為《電影痴》，最後以《曾經擁有》作實。電影於2017年拍竣，其後公映的消息都只聞樓梯響，以為電影會無聲無息被遺忘，但2022年竟然在馬來西亞舉行的「亞洲電影巡迴放映」作了放映，直到今年1月4日，電影才在香港作首次公開放映，我就趁這個富紀念性的一天，相約導演徐梓耀（Keian）在放映前做了一個訪問。

擱置8年的迷思

《曾經擁有》無疑是不少港片迷縈繞多年的迷思，男主角「黑哥」姜皓文當年仍未拍《翠絲》，女主角Fish廖子妤仍是《骨妹》時期的青澀。對於擱置的原因，Keian表示無需太多惴測甚至神化，一切都是計數。

《曾經擁有》原本是一個網絡電影的計劃，所以電影分別有兩位監製和編劇。當時Keian是天下一的編劇，知道公司有意大展拳腳，所以就建議不如正正經經做一套電影，但斷估不到電影拍完後久久不能公映。

關於這電影，這8年來最多人問Keian的問題有兩個，第一個是為何改名，第二個是為何擱置這麼久，他在不同階段都有不同的回應。

「頭3年我會好老土借用《無間道》嘅對白，三年又三年，死啦，我已過咗6年，唔會再講呢個對白。我試過講笑咁講，我係搞啲vintage嘢，故意嘅。但電影可以咁做咩？真係聞所未聞，即係拍完故意擺喺度做舊佢，呢套係一套好有vintage感覺嘅電影。」

電影的命運，往往並不是大家想像般複雜，其實都是時機，更重要是計數，投資方都是在商言商。

「呢件事冇人想嘅，有人話呢套戲已變成都市傳說，我覺得神化咗，其實唔係咁難理解，投資者揼錢出嚟拍電影，投資大風險高，佢哋要計數係一件好合理嘅事，而呢幾年個世界變得咁快，大家就更加小心。」

Keian表示配合當時天下一的發展藍圖也是電影上映的考量，特別是男主角黑哥拍完這套後就接拍話題作《翠絲》，電影公司需要一併作出考慮。

「大家睇緊嘅係天下一或者黑哥嘅發展藍圖，不如《翠絲》出先啦，好似會比較容易有noise，不如等佢攞多個提名先啦，睇吓會唔會對件事有幫助。又可能係有啲適當嘅時候冇出手，而跟住幾年就疫情了，其實沒有任何驚天大陰謀，只不過係計劃趕不上變化，咁拖吓拖吓轉眼就8年。」

最任性但也最真

「要攞套8年前嘅作品出嚟係驚㗎，回頭睇返覺得係一幅小朋友畫作，畫到鬼畫符咁，雜亂無章，粗之大葉，但容許我客觀啲咁講，我覺得佢亦都係最真的。」

Keian形容這電影像他的初戀，因為這是他首執導筒，所以他會較任性地橫衝直撞，甚至有點輕率，因為初戀是盲目的。他坦承電影投放過多個人情感，因為他有很多話想說，但經驗不足令整件事不夠專業。這種任性，一生人可能只得一次。

「你經歷多咗，就不免計算更多，會多咗好多考量。我自己睇返覺得幾得意，但有好多嘢現在已做唔到，當然也會覺得有很多不足嘅地方。」

Keian以昔日香港的走鬼小販檔形容《曾經擁有》，「你想食米芝蓮就一定唔係呢套，但唔代表佢冇生存空間或可取之處。我形容呢套戲就係我細個時嘅手推車魚蛋，走鬼嗰啲，還有臭豆腐、腸粉，有佢嘅地道風味。」

有始也有終

「其實《曾經擁有》相對《風林火山》嗰啲幾億項目平好多，但我反而多嘢諗咗，嗰陣時亦都唔係咁上心，但係又唔得㗎嘛，有時唔係套戲規模大定細嘅問題，例如以食物安全為例，唔係只有五星級酒店米芝蓮先要注意食物安全，街邊賣魚蛋都要注意。」

電影拍竣多年仍趕不上時機面世，對一位新導演來說無疑是沮喪的事，等了一年後又一年都沒有著落，Keian同自己講要Let go，要Move on，要放下這個初戀，但他始終都難以做到。

「我呢兩日喺度執緊個folder，8年來我搬咗幾次屋，換咗幾部電腦，呢個叫做電影痴漢嘅folder就一直喺我desktop度，我成日都好想鏟走佢，但我始終覺得交代唔到。」

時機總會無緣無故地來，機會也可能會無緣無故地離開，Keian認為現在是時機，沒有什麼所謂的轉捩點，純粹timing對，那就趁機將電影完結，他強調有始有終非常重要。

電影痴漢

「《電影痴漢》咪好囉，點解要改名？」這是最多人問Keian的問題。他同意《電影痴漢》較商業和吸引，但《曾經擁有》卻多了一份經歷。

「佢係我一個初戀嚟，但係時間耐咗，尤其係咁耐，你就多咗好多時間去消化，8年之後睇返你嘅初戀一定會唔同，人成熟咗，經歷多咗，我覺得嗰陣時太興奮，始終呢件事關於我嘅青春，關於港產片嘅情懷，我知道呢個名好悶，但我覺得係啱嘅，我想以比較嚴肅、尊重地去面對呢件事嘅完結，而唔係我當年嗰種好輕率去玩玩吓嘅心態，而呢件事對於我嚟講真係一個曾經擁用。」

至於電影痴漢確實啟發自一位真實人物，但Keian鄭重地強調電影並非真人真事，只是借用他某些元素再自行創作。電影圈內對這位真實人物不會陌生，他經常在電影拍攝現場和活動上出現。Keian初時對他相當好奇，起初以為他是記者或瘋狂粉絲，但觀察一段時間後覺得他不是想像般簡單。

「有一次喺打風嘅拍攝現場，原本應該由location A去location B，但由於打風關係，A拍完之後我哋就臨時轉景去C拍，所以係唔會有人知呢件事，當時我作為一個副導演，通常會最早去到現場打點，唔知點解佢仲早過我到，咁我就肯定佢有內幕消息；第二，佢嚟探班係唔會打擾到我哋拍攝，佢會靜靜企埋一邊，但佢又唔係亂嚟㗎喎，譬如我哋咁啱拍緊master，下一個shot會喺呢邊補返個頭，佢已經企咗喺嗰個位影緊，呢條友識㗎喎。」

Keian雖對這人相當好奇，但卻刻意與他保持距離，縱使也會和他正常交談，但絕不會問他的背景。「我淨係要個題目嘅Question mark，我唔想變咗真人真事，因為咁樣會變成另外一件事，同埋會影響到佢原本嘅生活。」

影評

電影也提到影評在香港電影生態圈的狀況，網絡時代每個人都是影評，但當中良莠不齊，一定有嘩眾取寵為了搶關注的人，這也是創作人在這個時代需要面對的挑戰。Keian對影評持開放的態度，他認為最重要是個人心態。

「如果你心態唔好，儘管影評係讚你都係害死你，可能佢鬧得啱呢，我反而會調轉講，你要鬧唔該你鬧好啲，認真啲鬧，有益嘅真係無妨，唔係讚定貶嘅問題，話唔埋我真係學到嘢都唔出奇。」

Keian強調做電影一行mindset必須開放，特別要多與年青一代溝通，因為他們永遠都是最快接收最新資訊的一群。

「我屋企嘅環境有好多細佬妹，遍布唔同嘅年齡層，我好容易會睇到細我10年20年嘅人喺度講緊咩。你想喺呢個行業做，其實最應該請教嗰啲十幾歲，聽下佢哋喺度講啲咩，用緊咩字，講緊咩topic。」

Keian認為世界每天都在變，最忌是死抱着既有概念一成不變，不要害怕錯，即管去嘗試。「譬如今次《曾經擁有》嘅網絡宣傳，大家諗唔到做咩，亦都坦白講冇乜資源，我哋起初好天真咁用AI嚟做，但係做嚟做去都係錯，我話唔緊要，由得佢錯，呢個錯其實都可以好好笑，好似一啲港產片以前片尾嘅NG片段一樣。」

8年已是滄海桑田

8年時間，話長唔長，話短唔短，但對這幾年那種追不上變化的狀態，觀影的過程格外感觸，那曾經擁有的人，曾經擁有的電影，還有這個曾經擁有的城市。電影中不少主場景已不復存在，維修店、小食店、茶座皆結業，主要的取景地紅磡和深水埗近年變化甚速，在時間的洪流中成為歷史，電影彷彿記下了那裡的曾經。

「其中一個景係一條天橋，橋上發現多咗塊鏡，鏡上有個哈哈笑圖案，我唔知咩人畫，但係我嗰刻就拍咗落電影入面。隔咗一段日子咁啱喺附近，我突然好想睇下嗰塊鏡，鏡仲喺度，但個哈哈笑就俾人髹咗。我好多謝佢，令到我個shot豐富咗，但係好可惜，有塊鏡喺度，你俾我髹油係唔會髹落去囉，又唔阻住你，香港係好奇怪嘅地方。」

香港電影的困局

對於香港近年萎靡不振的電影工業，Keian認為不只是電影這一行，整個香港都一樣困難，最重要是如何為香港定位，不要一廂情願地強調「香港製造」四個字。他現在已不敢再說港產片三個字，他會說廣東話電影。

「現在的困難時期更加要認清現實，要睇清楚世界現在欠缺咩嘢，荷里活韓國唔好講，馬來西亞、臺灣、泰國都上緊嚟，佢係咪真係咁需要香港人啲嘢，香港嘅特色喺邊呢？如何喺呢個環境佔一席位呢？我覺得首先要考慮呢樣嘢，唔好夾硬話要香港製造。」

香港的特色是競爭力的根本，但也不能抱殘守缺，而是要因應大環境有機地進化，不同時期也有不同的香港特色，重點是當中的獨特性，是別人無法複製的獨特性。

在這困難時期，Keian認為有時要有先死而後生的準備。「梗係會有低潮㗎啦，你現在唔係滅族，仲有人講廣東話㗎嘛，咁咪睇吓邊個諗到啲新方法去做囉，但係一定唔係以前嘅做法，大家一齊投石問路，一路做一路睇。」

拍照：Gary Wong @電影朝聖
劇照：天下一電影