訪問《破．地獄》導演陳茂賢之時，電影已開出亮麗的成績，坊間更有不同角度的專題和訪問。在思索訪問的角度時，翻開了上半年在紅磡做過的電影導賞團資料，當中與《破．地獄》的故事也有關連，那不如就從紅磡開始。

從紅磡說起⋯⋯

對於一套以香港殯儀業為背景的電影，《破．地獄》以紅磡作為主場景是最合理的，也是必須的。紅磡作為電影其中一個重要角色，在陳茂賢眼中是一個有趣的地方。以紅磡火車站為地標，一邊是殯儀業的集中地，隔一條街就是住宅區和商場，紅磡就是一個集齊生老病死的社區。他認為人生就好像一程車，紅磡的格局很符合他的價值觀。「衣食住行喺機利士南路嗰邊，但中間隔咗一個紅磡火車站，好似我嗰邊嘅人生完咗，就去呢個火車站轉車，再行過去嗰邊進行白事，我覺得呢個代表咗人生嘅關係。」

陳茂賢坦言拍攝之前不太喜歡紅磡這個地方，受到信奉民間信仰的母親影響，他覺得與白事相關的地方是不吉利的。「由細到大阿媽都會話見到靈車要擰歪面，去紅磡呢啲區域嘅時候要一路向前行唔好擰返轉頭，擰轉頭望就表示我會再嚟呢啲地方，即係寓意有人離世。」但拍完《破．地獄》後，他對這區有很大的改觀。

為了拍攝這部電影，陳茂賢花了差不多一年時間在紅磡腳踏實地做資料收集，他跟着殯儀顧問去了解該處的殯儀館、長生店和道堂的運作事宜，長時間在區內觀察，讓他體驗這個地方並沒有想像中大吉利是，也沒有特別需要避忌的地方，那裡和其他社區一樣有人居住，有小孩上學，有coffee shop，有拖住喼的遊客經過，其實那是一個悠閑又溫暖的社區。「可能我哋拍嘅時候係冬天，有陣時啲陽光射落嚟真係幾舒服，又暖又凍。拍完之後深入了解咗呢度，其實呢個地方都幾好啊。」

紅磡萬國殯儀館是電影的重要取景地，香港電影很少在真正的殯儀館內取景。陳茂賢表示拍攝時沒有什麼特別的禁忌，過程中有喃嘸顧問跟場，他們會為劇組做一些相關儀式，例如檻火盆等等。「因為我本身係佛教徒，做呢啲嘢都好正常，唔做我又冇乜所謂，子華都只係攞住張嘢揈吓就算。」

在殯儀館取景，陳茂賢表示最擔心是阻礙殯儀從業員工作，也害怕影響在該處辦喪事的家屬。「我哋雖然係等殯儀館吉晒先拍，但我哋都有落去條街度拍，嗰度真係好多人工作，又好多家屬，我好記得拍到ending子華同家怡喺殯儀館出嚟嗰個鏡頭，就要趕喺朝早殯儀館營業之前要拍晒，所以我哋天未光就已經去ready，到天光就即刻拍。」

哲學人與佛教徒

電影其中一個焦點是撮合了兩位重量級演員黃子華和許冠文合作，對陳茂賢而言，許冠文是讓他敬重的祖師爺，持敬畏之心，在片場時不敢太麻煩他。而他與黃子華的關係較緊密，除了討論電影本身外，更多的是分享各自對生死相關的哲學和宗教議題。眾所週知黃子華在大學是念哲學，陳茂賢則是佛教徒，對宗教方面有一套想法，當哲學人與佛教徒走在一起，話題很自然地產生出來，繼而讓他們有更深入的溝通，互相知道對方的想法，這間接令拍攝過程更加順利。「我與子華會傾大家點睇生同死，佢喺哲學層面點樣睇生死，我喺宗教層面上又點睇生死，佢好有興趣去了解佛學，佛教點睇輪迴的生死觀，我哋比較多傾呢啲，反而真正討論劇本就唔超過3次，其餘都係閒話家常，反而咁樣令我哋好了解對方，互相知道各自係點諗嘢，合作嘅時候就會舒服好多。」

陳茂賢特別提到電影的結局，原本他一直都堅持一個悲慘的結局，但拍攝完畢後，黃子華幾乎每三日提他一次要慎重考慮那個結局，他強調電影工作者需要有社會責任，那責任並非要拯救世界那樣大。「佢話如果有人感受到你悲慘嘅價值觀，而佢衍生咗一個念頭做出一啲唔好嘅決定，呢個會係我哋呢一世都唔安樂嘅事。最後面向觀眾嘅就係導演，當你面向觀眾嘅時候，你受唔受得起。」子華強調沒打算干預他的創作，但就請他要三思而後行。

最後結局的版本其實也是冥冥之中注定，那要追溯陳茂賢在拍攝期間，某個晚上站在萬國殯儀館的十字路口，他一直看着前方的隧道看了很久，那刻突然覺得需要拍攝這條隧道，如何套用在電影中則未有想法，於是就着監製向有關部門申請拍攝。「監製問我搞乜，我話唔知，但我好想最後ending係子華揸住架車通過呢條隧道離開呢個地方，呢一邊嘅紅磡係代表死亡，我好想佢離開，佢睇通咗就會離開，我覺得呢條隧道會幫到我。」

陳茂賢覺得他的想法在拍攝的過程中不知不覺改變了，他現在常對子華說，電影中的道生，第一個超度的並非戲裡的人，而是導演自己。他仍清楚記得電影煞科時他仍堅持那個悲劇的結尾，但原來那時已播下改變的種子，只是仍未開花而已。「本來我已lock咗cut，但我記得有1天瞓醒，我有一個好強嘅感覺要再剪過部戲，跟住我就call監製返嚟，叫佢哋俾多日時間我再剪，最後剪咗現在上畫嘅版本，我覺得係呢部戲嘅力量改變咗我。」

原生家庭的陰影

電影除了講生死，也從家庭關係帶出傳统對原生家庭造成的影響。

在《破 · 地獄》中，朱栢康飾演的長子是讓人印象深刻的角色之一，他飾演許冠文的長子郭志斌，一個不見笑臉苟且活着的人，長子的身份讓他背負着與生俱來的期望與責任，令他半生未曾為自己活過。傳統對他來說是枷鎖，但傳统同時也有值得保存的意義。

陳茂賢認為傳統是祖輩留下來的東西，理應要尊重，但要有智慧去看待。現在是2024年，傳统也要因時制宜，要有自己的思維方式，要知道為什麼會有這個傳統，「你可以跟傳統，但係你要知道點解要跟，而唔係盲跟。」他以孝順父母為例，認為孝順和愚孝只差一個字，但意義就差天共地。「譬如我對自己嘅父母大部分情況都可以順從佢哋，但如果有啲真係違反我個人嘅價值觀或者意願，我都會拒絕，但係都無阻我孝順和對佢哋嘅感恩。」

陳茂賢是家中的獨子，對傳统東方原生家庭的影響感受甚深。身為獨子的他，身邊同時也有很多堂兄堂妹和表兄表妹，每當有人犯錯，他往往會是首當其衝被責的一個。「東方家庭嘅父母好鍾意貶低自己嘅孩子，成日叫你學吓人哋啦，你睇吓人哋邊個邊個幾叻呀，我都係喺呢啲家庭之下成長。其實原生家庭嘅傳統思想係會害咗個小朋友，佢哋會懷疑自己係咪真係咁差，好多人就係咁樣俾佢改變咗大半生人嘅諗法。」

陳茂賢表示《破．地獄》的團隊常勸他要多一點自信，但因為原生家庭的關係，他形容自己是從踐踏中成長而來的人，所以潛意識都影響他的作風與想法。「就算現在《破．地獄》有咁好嘅票房和迴響，但係我依然會focus喺一啲唔好嘅評語，呢個都係我原生家庭好影響我嘅嘢。我會反思一輪究竟係咪真係唔好呢，係咪人哋吹噓我哋呢？譬如有殯儀行家話唔夠真實搵戲嚟做，咁我會返去自責好耐。其實當我返轉頭諗，我就會覺得其實都唔需要，呢個始終係一個電影。」

陳茂賢希望大家看完這部電影後，會了解這世上可能有些人需要用很長時間去克服原生家庭的陰影。「10年後你再問我，我都可能會focus喺一啲唔好嘅評語，我覺得我改唔到，但係呢樣嘢我覺得同我嘅成長好有關係。」

海外影展的感想

《破．地獄》早前被邀到東京國際電影節和夏威夷國際電影節放映，對海外觀眾來說，電影讓他們感到新鮮，好奇心引發他們的興趣。

陳茂賢表示，電影在東京國際電影節有兩場放映，其中一場是官方的放映，日本人、外國人和香港人各佔三分一，在那場分享會中，觀眾除了對破地獄這儀式表達興趣外，更有觀眾聚焦片中關於原生家庭、父權、重男輕女等元素。「年長少少嘅女性會話文哥有啲似佢哋爸爸，後生啲嘅就話佢哋爸爸唔係咁，不過都一樣係黑口黑面，但就冇文哥咁堅持，咁樣就會睇到其實個時代係進步緊。」來觀影的日本觀眾多數都喜愛港產片，同時也很熟悉香港，更懂得說廣東話，並寫了些信和postcard給劇組，他們皆覺得紅磡那專做白事的地區很有趣。

外國人覺得破地獄是一個好靚的葬禮，當中講及的家庭關係和延伸的感情皆能放諸四海，外國人也有共鳴。「啱啱我哋部戲喺英國上影，有個發行send咗段片俾我，係當地一位英國觀眾，佢睇完之後喺個戲院度喊咗好耐，佢話戲中嘅許冠文令佢諗起自己嘅爸爸。」

港片的其他可能

電影開畫後取得極亮麗的成績，「破地獄」一詞更成為流量密碼。但另一方面，香港電影工業正迎來最壞的時候，《破．地獄》的賣座對香港電影工業有何啟示？

陳茂賢表示《破．地獄》可以引證一個冷門題材也有成功的可能，即使是一個昔日大家都避之則吉的殯儀題材。「我覺得正正搵咗子華同許冠文之後可以將部戲拉返近觀眾，你可以話係商業，但我覺得呢個就係港產片其中一條出路。」他強調昔日港產片的成功模式已未必能成功，這種模式見於喜劇、動作片、警匪片等類型片，模式諸如3分鐘一個細gag，5分鐘一個大gag等，再早一個年代的拳頭枕頭模式，到現在已不合時宜。

他首兩部《不日成婚》系列也嘗試從舊模式中尋找另一種可能性。「我做《不日成婚》第一集嘅時候，我啱啱卡住喺中間，即係承接咗上一輩港產片嗰種行業模式嘅喜劇，《不日成婚》就帶咗呢啲氣息落嚟去拍攝，票房以當時嚟講OK嘅，但我發現走唔出以前嘅行業運作模式，有種舊酒新瓶嘅感覺。跟住喺《不日成婚2》試下唔好再跟呢種模式，嘗試認真去探討一啲命題，不過就商業一點，加少少瘋狂笑料落去，睇下可唔可以變一種新嘢出嚟，雖然票房唔成功，但起碼為兩位演員獲得金像獎提名，一部小品喜劇可以被提名金像獎係好唔容易。」

去到《破．地獄》，陳茂賢認為這是一個在舊思維下連題材都不應該出現的項目，但竟然有老闆肯投資。「我開始寫劇本嘅時候，就係用黃子華隻眼去見眾生，即係道生見眾生，用一班人去幫我講一個大嘅名題。」所以另一個重點是以戲劇為先，儘管電影的主角是黃子華和許冠文，戲份都不能過多，一切以服務戲劇行先。「香港電影應該唔好再諗以前嗰個行業模式，即係我哋打咗咁多年442，唔得就要轉。喺一啲以往根深蒂固覺得一定要跟嘅嘢，就不如試下唔好咁做，大家可以多啲選擇。你依然可以跟返行業模式，但我覺得起碼做咗一樣嘢出嚟係可以證明有另一種可能。」

拍照：Gary Wong @電影朝聖
劇照：英皇電影