因為《幻愛》，所以屯門，也勾起了我與屯門的糾結。

初次來屯門 大約是82/83年，那年我外公外婆從土瓜灣搬到兆康。還記得第一次坐巴士到屯門，從叻君被尚義踢入會的電影現場「三邨一苑」，乘坐27號到旺角，再轉乘66號巴士到大興。到大興食碗牛什河充電後再乘車到兆康。山長水遠，第一次入屯門最興奮，其後沒有了新鮮感，剩下的就只有煎熬。

初中以前，每星期日如常入屯門，大人忙於嚦咕嚦咕，細路如我就只有等，惟有用自己的方式打發時間。屋內有一隻叫「高B」的喵星人，經常被我戲弄，細路仔真係好邪惡⋯⋯ 還有書，大舅父房內的獵奇書和二舅父房內的歷史書也充實了我的時間，當時看了很多地球奧秘之類的書，還有一本「符碌成」（傅樂成）寫的歷史書，都是我當年的恩物。

1984年，《新紮師兄》播放那年，我在屯門受了傷，在外公家被一煲滾湯灼傷。淋到嗰吓唔算痛，最痛嗰吓係換藥，扯開黏著傷口的紗布痛入心。不過當時最深刻的並唔係點痛，而係每次幫我換藥的女護士，短髮脫俗溫柔，第一次有心動的感覺，佢當時還幫我改咗個花名叫「好姐」，睇過《新紮師兄》的會心領神會。其後短髮護士沒有再來，換來一位貌似《功夫》哨牙珍的粗魯護士，每次換藥都俾佢扯到出血⋯⋯

其後，家裡發生點狀況，令我對屯門有了很大的陰影。
傷口留低嘅疤痕，掂到仍在痛，即係仲未好番。
這陰影一直到近年才能放下⋯⋯
那年大約是1989，咁啱又得咁橋，我對屯門的回憶就在這一年突然止住了。

上星期坐著67X巴士，從長沙灣道轉入彌敦道嗰吓，突然有份莫名的放鬆，想起那些年搭66號巴士，在長沙灣道轉入彌敦道，見到「金都商場」的一刻，即表示快要落車，好快就可以番屋企。